WPL 2026: மும்பை இந்தியன்ஸ் சோலி முடிந்தது.. WPL எலிமினேட்டருக்கு தகுதி பெற்ற டெல்லி கேப்பிட்டல்ஸ்

வதோதரா: 2026 மகளிர் பிரீமியர் லீக் தொடரின் பரபரப்பான கடைசி லீக் ஆட்டத்தில், யுபி வாரியர்ஸ் அணியை 5 விக்கெட்டுகள் வித்தியாசத்தில் வீழ்த்தி டெல்லி கேப்பிட்டல்ஸ் அணி எலிமினேட்டர் சுற்றுக்குத் தகுதி பெற்றது. இந்த வெற்றியின் மூலம், நடப்புச் சாம்பியனான மும்பை இந்தியன்ஸ் அணி பிளேஆஃப் சுற்றுக்குச் செல்ல முடியாமல் தொடரிலிருந்து வெளியேறியது.

பந்துவீச்சில் மிரட்டிய டெல்லி

ஞாயிற்றுக்கிழமை நடைபெற்ற வாழ்வா சாவா ஆட்டத்தில், டாஸ் வென்று முதலில் பேட்டிங் செய்த யுபி வாரியர்ஸ் அணி, டெல்லி அணியின் துல்லியமான பந்துவீச்சைச் சமாளிக்க முடியாமல் திணறியது. டெல்லி வீராங்கனை மரிசான் கேப் அபாரமாகப் பந்துவீசி 3 விக்கெட்டுகளைச் சாய்த்தார்.

சினெல் ஹென்றியும் தனது பங்குக்கு 2 விக்கெட்டுகளை வீழ்த்தினார். இதன் விளைவாக, யுபி வாரியர்ஸ் அணி 20 ஓவர்கள் முடிவில் 8 விக்கெட் இழப்புக்கு 122 ரன்கள் மட்டுமே எடுத்தது. அந்த அணியில் அதிகபட்சமாக தீப்தி சர்மா 24 ரன்களும், ஷிகா பாண்டே ஆட்டமிழக்காமல் 23 ரன்களும் எடுத்தனர்.

சற்று தடுமாறிய சேஸிங்

123 ரன்கள் என்ற எளிய இலக்கைத் துரத்திய டெல்லி கேப்பிட்டல்ஸ் அணிக்கு லாரா வோல்வார்ட் (47) மற்றும் ஷஃபாலி வர்மா (29) ஆகியோர் வலுவான அடித்தளம் அமைத்தனர். ஒரு கட்டத்தில் டெல்லி அணி 84 ரன்களுக்கு ஒரு விக்கெட்டை மட்டுமே இழந்து எளிதாக வெற்றி பெறும் நிலையில் இருந்தது. ஆனால், திடீரென விக்கெட்டுகள் சரிந்ததால், டெல்லி அணி 101 ரன்களுக்கு 5 விக்கெட்டுகளை இழந்து சற்று தடுமாறியது. இதனால், யுபி வாரியர்ஸ் அணிக்கு மீண்டும் ஒரு வாய்ப்பு கிடைத்தது.

பொறுப்பான ஆட்டத்தால் வெற்றி

நெருக்கடியான சூழலில் களமிறங்கிய கேப்டன் ஜெமிமா ரோட்ரிக்ஸ், தனது அனுபவ ஆட்டத்தை வெளிப்படுத்தி அணியை வெற்றிப் பாதைக்கு அழைத்துச் சென்றார். அவர் 18 பந்துகளில் 5 பவுண்டரிகளுடன் 34 ரன்கள் குவித்து ஆட்டமிழக்காமல் இருந்தார். இறுதியில், 18.4 ஓவர்களில் 5 விக்கெட் இழப்புக்கு 126 ரன்கள் எடுத்து டெல்லி அணி வெற்றி பெற்றது.

மும்பையின் வெளியேற்றம்.. குஜராத்துடன் மோதல்

இந்த வெற்றியின் மூலம், டெல்லி கேப்பிட்டல்ஸ் அணி 8 புள்ளிகளுடன் மூன்றாவது இடத்தைப் பிடித்து எலிமினேட்டர் சுற்றுக்குத் தகுதி பெற்றது. மும்பை இந்தியன்ஸ் (6 புள்ளிகள்) மற்றும் யுபி வாரியர்ஸ் (4 புள்ளிகள்) தொடரிலிருந்து வெளியேறின. பிப்ரவரி 3, செவ்வாய்க்கிழமை நடைபெறும் எலிமினேட்டர் ஆட்டத்தில் டெல்லி கேப்பிட்டல்ஸ் அணி, குஜராத் ஜெயண்ட்ஸ் அணியை எதிர்கொள்கிறது. இதில் வெற்றி பெறும் அணி, பிப்ரவரி 5 அன்று நடைபெறும் இறுதிப் போட்டியில் ராயல் சேலஞ்சர்ஸ் பெங்களூரு அணியுடன் மோதும்.