இருந்த ஒரு பிரச்னைக்கும் தீர்வு..நிம்மதி பெருமூச்சு விடும் அஸ்வின், ஜடேஜா..கவாஸ்கர் கூறிய நற்செய்தி

இங்கிலாந்து பிட்ச்

இங்கிலாந்து களத்தில் பேட்டிங்கை விட பவுலிங் தான் முக்கியமான ஒன்றாக பார்க்கப்படுகிறது. அதுவும் குறிப்பாக வேகப்பந்துவீச்சாளர்களுக்கு நல்ல பலன் கொடுக்க கூடிய ஒன்றாக உள்ளது. இந்தியாவை போன்று இல்லாமல் பந்தில் நல்ல ஸ்விங் மற்றும் வேகம் இருக்கும் என கூறப்படுகிறது. இதனால் ஸ்பின்னர்களுக்கு பெரிய அளவில் விக்கெட்கள் கிடைப்பதில் சந்தேகமே.

நீடிக்கும் குழப்பம்

வேகப்பந்துவீச்சை பொறுத்தவரை யார் யார் ப்ளேயிங் 11ல் இடம் பெறுவார்கள் என்ற குழப்பம் நீடித்து வரும் சூழலில், சுழற்பந்துவீச்சில் அஸ்வின் - ஜடேஜா ஜோடியை களமிறக்க வாய்ப்புள்ளதாக கூறப்பட்டு வருகிறது. அதற்கேற்றார் போல், இந்தியா அறிவித்துள்ள 15 பேர் கொண்ட அணியில் அவர்கள் இருவரின் பெயரும் இடம் பெற்றுள்ளது. ஆனால் இங்கிலாந்தின் வானிலையை பொறுத்தே இவர்களின் வாய்ப்புகள் உறுதியாகும். அங்கு தற்போது குளிர்காலமாக பார்க்கப்படுகிறது. எனவே சற்று பனிப்பொழிவு இருந்தால், பந்தில் டேர்னிங் இல்லாமல் ஸ்பின்னர்கள் சிரமப்படுவார்கள்.

கவாஸ்கர் விளக்கம்

இந்நிலையில் அஸ்வின் - ஜடேஜா கண்டிப்பாக விளையாடுவார்கள் என சுனில் கவாஸ்கர் தெரிவித்துள்ளார். டெஸ்ட் சாம்பியன்ஷிப் இறுதிப்போட்டிக்கான வர்ணனையாளராக கவாஸ்கர் செயல்படவுள்ளார். எனவே போட்டி குறித்து பேசிய அவர், சவுத்தாம்டனில் கடந்த சில நாட்களாக நல்ல வெயில் அடித்து வருகிறது. எனவே பிட்ச்சானது நன்கு வறண்டு சுழற்பந்துவீச்சுக்கு உதவும். இதனால் அஸ்வின் மற்றும் ஜடேஜா கண்டிப்பாக இந்திய அணியில் விளையாடுவார்கள் என தெரிவித்துள்ளார்.

இந்தியாவின் பலம்

ஜடேஜா மற்றும் அஸ்வின் பவுலிங் மட்டுமல்லாமல் பேட்டிங்கிலும் உதவக்கூடியவர்கள். கடந்த ஆஸ்திரேலியா மற்றும் இங்கிலாந்து டெஸ்ட் தொடர்களில் இருவரின் பேட்டிங்கும் சிறப்பாக இருந்தது. இதுமட்டுமல்லாமல் இடதுகை பேட்ஸ்மேன்களுக்கு எதிராக அஸ்வின் பெரும் அச்சுறுத்தலாக இருப்பார். நியூசிலாந்து அணியில் 3 வீரர்களுக்கு மேலாக இடதுகை பேட்ஸ்மேன்கள் இருப்பார்கள் எனக்கூறப்படுகிறது.