டெஸ்ட் சாம்பியன்ஷிப்பில் இந்தியாவுக்கு அடி.. நியூசிலாந்து செய்த சம்பவம்.. புள்ளிப்பட்டியல் 6வது இடம்

வெலிங்டன்: நியூசிலாந்து மற்றும் வெஸ்ட் இண்டீஸ் அணிகள் மோதிய இரண்டாவது டெஸ்ட் போட்டியில் நியூசிலாந்து அணி 9 விக்கெட் வித்தியாசத்தில் அபார வெற்றி பெற்றது. இந்த வெற்றியின் மூலம் உலக டெஸ்ட் சாம்பியன்ஷிப் (WTC 2025-27) புள்ளிப்பட்டியலில் நியூசிலாந்து அணி ஜெட் வேகத்தில் முன்னேற, இந்திய அணி மேலும் ஒரு இடத்தைச் சறுக்கி 6-வது இடத்திற்குத் தள்ளப்பட்டுள்ளது.

வெலிங்டனில் உள்ள பேசின் ரிசர்வ் மைதானத்தில் நடைபெற்ற இந்த டெஸ்ட் போட்டியில், நியூசிலாந்து பந்துவீச்சாளர்கள் வெஸ்ட் இண்டீஸை திணறடித்தனர். இரண்டாவது இன்னிங்ஸில் வெஸ்ட் இண்டீஸ் வெறும் 128 ரன்களுக்குச் சுருண்டது. 56 ரன்கள் என்ற எளிய இலக்கை 1 விக்கெட் இழப்பிற்கு எட்டிய நியூசிலாந்து, தொடரைக் கைப்பற்றியதோடு புள்ளிப்பட்டியலிலும் அதிரடி காட்டியுள்ளது.

நியூசிலாந்தின் அதிரடி பாய்ச்சல்

இந்தப் போட்டிக்கு முன்பு வரை புள்ளிப்பட்டியலில் 7-வது இடத்தில் இருந்த நியூசிலாந்து அணி, இந்த வெற்றியின் மூலம் நேரடியாக 3-வது இடத்திற்கு முன்னேறியுள்ளது. 2021 சாம்பியனான நியூசிலாந்து தற்போது 66.67 வெற்றி சதவீதத்துடன் வலுவான நிலையில் உள்ளது.

நியூசிலாந்தின் இந்தத் திடீர் முன்னேற்றம் இந்திய அணிக்குப் பின்னடைவை ஏற்படுத்தியுள்ளது. ஏற்கனவே தென்னாப்பிரிக்காவிடம் சொந்த மண்ணில் 0-2 எனத் தொடரை இழந்து 5-வது இடத்தில் இருந்த இந்தியா, தற்போது 6-வது இடத்திற்குச் சறுக்கியுள்ளது. இந்தியாவின் வெற்றி சதவீதம் 48.15 ஆக உள்ளது. தொடர்ந்து இரண்டு முறை உலக டெஸ்ட் சாம்பியன்ஷிப் இறுதிப்போட்டிக்குச் சென்ற இந்தியா, இம்முறை முதல் இரண்டு இடங்களுக்குள் வருவது மிகவும் கடினமாகி வருகிறது.

முதலிடத்தில் ஆஸ்திரேலியா

ஆஸ்திரேலிய அணி விளையாடிய 4 போட்டிகளிலும் வெற்றி பெற்று 100% வெற்றி சதவீதத்துடன் கம்பீரமாக முதலிடத்தில் நீடிக்கிறது. தென்னாப்பிரிக்கா 75% வெற்றி சதவீதத்துடன் இரண்டாம் இடத்தில் உள்ளது.

உலக டெஸ்ட் சாம்பியன்ஷிப் புள்ளிப்பட்டியல் (டிசம்பர் 12 நிலவரப்படி):

• ஆஸ்திரேலியா - 4 போட்டிகள் - 4 வெற்றிகள் - 0 தோல்வி - 0 டிரா - 48 புள்ளிகள் - 100.00 PCT%
• தென்னாப்பிரிக்கா - 4 போட்டிகள் - 3 வெற்றிகள் - 1 தோல்வி - 0 டிரா - 36 புள்ளிகள் - 75.00 PCT%
• நியூசிலாந்து - 2 போட்டிகள் - 1 வெற்றி - 0 தோல்வி - 1 டிரா - 16 புள்ளிகள் - 66.67 PCT%
• இலங்கை - 2 போட்டிகள் - 1 வெற்றி - 0 தோல்வி - 1 டிரா - 16 புள்ளிகள் - 66.67 PCT%
• பாகிஸ்தான் - 2 போட்டிகள் - 1 வெற்றி - 1 தோல்வி - 0 டிரா - 12 புள்ளிகள் - 50.00 PCT%
• இந்தியா - 9 போட்டிகள் - 4 வெற்றிகள் - 4 தோல்விகள் - 1 டிரா - 52 புள்ளிகள் - 48.15 PCT%
• இங்கிலாந்து - 6 போட்டிகள் - 2 வெற்றிகள் - 3 தோல்விகள் - 1 டிரா - 26 புள்ளிகள் - 36.11 PCT%
• வங்கதேசம் - 2 போட்டிகள் - 0 வெற்றி - 1 தோல்வி - 1 டிரா - 4 புள்ளிகள் - 16.67 PCT%
• வெஸ்ட் இண்டீஸ் - 7 போட்டிகள் - 0 வெற்றி - 6 தோல்விகள் - 1 டிரா - 4 புள்ளிகள் - 4.76 PCT%

Asia Cup U19: என்னையா சீண்டுகிறாய்? நோஸ்-கட் கொடுத்த வைபவ் சூர்யவன்ஷி.. ஆசிய கோப்பையில் வெறியாட்டம்

வெஸ்ட் இண்டீஸ் அணி 7 போட்டிகளில் 6-ல் தோற்றுப் புள்ளிப்பட்டியலில் கடைசி இடத்தில் உள்ளது. நியூசிலாந்து அடுத்த டெஸ்ட் போட்டியிலும் வென்றால், தென்னாப்பிரிக்காவைப் பின்னுக்குத் தள்ளி 2-வது இடத்தைப் பிடிக்கவும் வாய்ப்புள்ளது. இது இந்தியாவுக்கு மேலும் நெருக்கடியை ஏற்படுத்தும்.