"ஜெய்ஸ்வாலை திட்டமிட்டு அணியில் எடுக்கவில்லை".. அஸ்வின் ஆவேசம்.. இந்திய ஒருநாள் அணி சர்ச்சை

By Aravinthan

Published: Saturday, October 17, 2026, 8:26 [IST]

சென்னை: நியூசிலாந்துக்கு எதிரான 5 போட்டிகள் கொண்ட ஒருநாள் தொடருக்கான இந்திய அணியில் தொடக்க வீரர் யஷஸ்வி ஜெய்ஸ்வால் சேர்க்கப்படாதது பெரும் விவாதத்தைக் கிளப்பியுள்ளது. சுப்மன் கில்லுக்கு ஓய்வளிக்கப்பட்டுள்ள கடைசி 2 ஒருநாள் போட்டிகளில் கூட ஜெய்ஸ்வாலுக்கு வாய்ப்பு மறுக்கப்பட்டுள்ளது பலரையும் அதிர்ச்சியில் ஆழ்த்தியுள்ளது. இந்த விவகாரத்தில் பிசிசிஐ தேர்வுக்குழு மீது முன்னாள் வீரர் ரவிச்சந்திரன் அஸ்வின் தனது கடுமையான கோபத்தை வெளிப்படுத்தியுள்ளார்.

தனது யூடியூப் சேனலில் பேசிய அஸ்வின், "கடைசி 2 போட்டிகளில் சுப்மன் கில் ஆடாதபோது, அந்த இடத்திற்கு ஜெய்ஸ்வால்தான் முதல் தேர்வாக இருந்திருக்க வேண்டும். அவரைத் திட்டமிட்டுப் புறக்கணிப்பது மிகவும் அநீதியானது. தேர்வுக்குழுவின் இந்த நடவடிக்கை அந்த இளம் வீரரின் தன்னம்பிக்கையை அடியோடு தகர்த்துவிடும். ஜெய்ஸ்வால் எங்கு ஸ்டம்புகளை நட்டாலும் சளைக்காமல் ரன்களைக் குவிக்கும் ரன் மெஷினாகத் திகழ்ந்தவர். 2 அல்லது 3 ஆண்டுகளுக்கு முன்பு பயமின்றி ஆடிய ஜெய்ஸ்வால், இப்போது தயங்குவதற்கு போதிய வாய்ப்புகள் கிடைக்காததே காரணம்" என்று ஆவேசமாகக் கொந்தளித்தார்.

Yashasvi Jaiswal s Exclusion from ODI Squad Ravichandran Ashwin Slams BCCI and Selectors

டெஸ்ட் போட்டிக்குத் தயாராக வேண்டும் என்பதற்காக அவரது ஒருநாள், டி20 கிரிக்கெட் வாழ்க்கையைப் பலிகடா ஆக்கக் கூடாது என்று சாடிய அஸ்வின், "ஜெய்ஸ்வால் கடந்த 4 மாதங்களாக எந்தவொரு சர்வதேசப் போட்டியிலும் ஆடவே இல்லை. இலங்கைக்கு எதிரான டெஸ்ட் தொடருக்குப் பிறகு அவர் இந்திய அணியிலேயே இல்லை. சர்வதேச அரங்கில் களமிறங்கி விளையாடுவதை விட சிறந்த பயிற்சி வேறு எதுவும் இருக்க முடியாது. நான் தேர்வாளராக இருந்திருந்தால் ஜெய்ஸ்வாலிடம் பேசி, இந்த 2 போட்டிகளில் ஆட விருப்பமா என்று நேரடியாகக் கேட்டிருப்பேன். அவர் ஒரு விலைமதிப்பற்ற திறமைசாலி, அவரைப் பாதுகாக்க வேண்டியது அணி நிர்வாகத்தின் முக்கிய கடமை" என்று ஆதங்கப்பட்டார்.

IND vs WI 5வது டி20 மழையால் ரத்தானால் யாருக்கு கோப்பை? டிஎல்எஸ், ரிசர்வ் டே விதிகள் என்ன?

அடுத்த ஆண்டு ஒருநாள் உலகக் கோப்பை நடைபெற உள்ள சூழலில், ஜெய்ஸ்வாலின் புறக்கணிப்பு இந்திய அணியின் திட்டமிடல் மீதே சந்தேகத்தை ஏற்படுத்தியுள்ளது. முன்னாள் தேர்வுக்குழு தலைவர் அஜித் அகர்கர், ஜெய்ஸ்வாலுக்கு ஆதரவாக இருந்ததாகவும், ரோஹித் சர்மா மற்றும் ஜெய்ஸ்வால் இடையே எழுந்த முரண்பாடே அவரது பதவி நீட்டிக்கப்படாமல் போனதற்கு முக்கிய காரணமாகக் கூறப்படுகிறது. அனுபவமும் இளமையும் கலந்த ஒரு வலுவான உலகக்கோப்பை அணியை உருவாக்குவதில் தேர்வுக்குழு கோட்டை விடுவதாக அஸ்வின் சுட்டிக்காட்டி இருக்கிறார்.