இந்திய அணியில் இசான் கிஷனால் இந்த 24 வயது வீரருக்கு வாய்ப்பு கிடைப்பது சந்தேகம் தான்- ஆகாஷ் சோப்ரா

மும்பை: 2027 ஒருநாள் உலகக்கோப்பைக்கான இந்திய அணியில் யஷஸ்வி ஜெய்ஸ்வாலுக்கு இடம் கிடைப்பது சந்தேகம் என முன்னாள் இந்திய கிரிக்கெட் வீரர் ஆகாஷ் சோப்ரா தெரிவித்துள்ளார். தொடக்க ஆட்டக்காரர் மற்றும் விக்கெட் கீப்பர் ஆகிய இரு இடங்களுக்கும் இஷான் கிஷன் மாற்று வீரராகச் செயல்பட முடியும் என்பதால், அணி நிர்வாகம் ஒரு பேட்டரைக் குறைத்துக் கொள்ள வாய்ப்புள்ளதாக அவர் சுட்டிக்காட்டினார்.

நியூசிலாந்துக்கு எதிரான ஐந்து போட்டிகள் கொண்ட ஒருநாள் தொடருக்கான இந்திய அணியில் இஷான் கிஷன் சேர்க்கப்பட்டுள்ளதுடன், கடைசி இரண்டு போட்டிகளுக்குத் துணை கேப்டனாகவும் நியமிக்கப்பட்டுள்ளார். அதேவேளையில், மற்ற டெஸ்ட் வீரர்களைப் போல அல்லாமல், முதல் மூன்று ஒருநாள் போட்டிகளுக்கான அணியில் கூட ஜெய்ஸ்வால் தேர்வு செய்யப்படவில்லை.

தமது யூடியூப் சேனலில் 2027 உலகக்கோப்பை அணியில் ஜெய்ஸ்வால் மற்றும் நிதீஷ் குமார் ரெட்டியின் வாய்ப்புகள் குறித்து பேசிய சோப்ரா, "நிதீஷ் குமார் ரெட்டிக்கு வாய்ப்பு கிடைக்கலாம், ஆனால் யஷஸ்வி ஜெய்ஸ்வாலால் இடம்பிடிக்க முடியாமல் போகலாம். தற்போதைய சூழலில், இஷான் கிஷன் விக்கெட் கீப்பர் மற்றும் தொடக்க ஆட்டக்காரருக்கான மாற்று வீரராக உருவெடுப்பார் என்று நினைக்கிறேன். ஒரே வீரர் இரு தேவைகளையும் பூர்த்தி செய்வதால் அணியில் கூடுதல் இடங்கள் இருக்காது" என்று கூறினார்.

IND vs NZ: புவனேஸ்வர் குமாருக்கு வாய்ப்பு தந்தது மகிழ்ச்சி!முகமது ஷமிக்கு ஏன் தரவில்லை-ரவி சாஸ்திரி

"ஜெய்ஸ்வால் விஷயத்தில் எனக்கு 50-50 என்ற அளவிலேயே நம்பிக்கை உள்ளது. அவர் தற்போது அணியிலேயே இல்லை. இஷான் கிஷன் மாற்றுத் தொடக்க ஆட்டக்காரராகவும் கீப்பராகவும் செயல்படுவதால், இத்தகைய சூழலில் கூடுதல் ஆல்ரவுண்டர் அல்லது வேகப்பந்து வீச்சாளரைச் சேர்க்கவே அணி நிர்வாகம் யோசிக்கும். இதனால் அவர்கள் ஒரு பேட்டரைக் குறைக்கக்கூடும்" என்றார்.

யஷஸ்வி ஜெய்ஸ்வால் இதுவரை விளையாடிய 6 ஒருநாள் போட்டிகளில் 71.25 சராசரியுடன் 285 ரன்கள் குவித்துள்ளார். இதில் ஆப்கானிஸ்தானுக்கு எதிராக ஆட்டமிழக்காமல் அடித்த 110 ரன்கள் உட்பட இரண்டு சதங்களும் அடங்கும். இருப்பினும், நியூசிலாந்துக்கு எதிரான 50 ஓவர் தொடரில் அவர் சேர்க்கப்படவில்லை.

அதே வீடியோவில், "நிதீஷ் குமார் ரெட்டியை அணியில் வைத்திருந்தால், சுழற்பந்து வீச்சு ஆல்ரவுண்டர் ஒருவரை வெளியேற்ற வேண்டியிருக்கும். அது வாஷிங்டன் சுந்தராக இருக்கலாம். ஏனெனில் தொடர் தொடங்கும் போது ஆடுகளங்கள் வேகப்பந்து வீச்சாளர்களுக்குச் சாதகமாக இருக்கும்" என்று அவர் கூறினார்.

Also Read

IND vs NZ: பும்ராவுக்கு வாழ்நாளில் முக்கிய அறிவுரை வழங்கிய ரவி சாஸ்திரி

இரண்டு மாதங்கள் நடைபெறும் இந்த தொடரின் பிற்பகுதியில் சுழற்பந்து வீச்சு முக்கிய பங்கு வகிக்கும் என்றாலும், ஹர்திக் பாண்டியாவின் உடற்தகுதி குறித்த கவலைகள் இருப்பதால், யஷஸ்வி ஜெய்ஸ்வாலை விட நிதீஷ் குமார் ரெட்டிக்கு அணியில் இடம் கிடைக்க அதிக வாய்ப்புள்ளது என்றும் சோப்ரா தெரிவித்தார்.நிதீஷ் குமார் ரெட்டி இதுவரை 5 ஒருநாள் இன்னிங்ஸ்களில் 27.25 சராசரியுடன் 109 ரன்கள் எடுத்துள்ளார். மேலும், 8 ஒருநாள் போட்டிகளில் பந்துவீசி 7.40 எகானமி விகிதத்தில் 3 விக்கெட்டுகளையும் வீழ்த்தியுள்ளார்.