கால்பந்து உலகக்கோப்பை.. பெனால்டி ஷூட் அவுட்டில் ஆஸ்திரேலியாவை வீழ்த்தி எகிப்து வரலாற்று வெற்றி!

நியூயார்க்: ஃபிஃபா உலகக் கோப்பை 2026 கால்பந்து தொடரின் பரபரப்பான ரவுண்ட் ஆஃப் 32 போட்டியில், ஆஸ்திரேலிய அணியை பெனால்டி முறையில் 4-2 என்ற கணக்கில் வீழ்த்தி எகிப்து அணி ரவுண்ட் ஆஃப் 16 சுற்றுக்கு தகுதி பெற்று புதிய சாதனை படைத்துள்ளது. உலகக் கோப்பை நாக்கவுட் போட்டியில் எகிப்து அணி பதிவு செய்த முதல் வரலாற்று வெற்றி இதுவாகும்.

ஆட்டத்தின் 13-வது நிமிடத்தில், எகிப்தின் இமாம் ஆஷூர் ஹெட்டர் மூலம் முதல் கோல் அடித்து தனது அணிக்கு 1-0 என முன்னிலை தந்தார். இரண்டாவது பாதியில், ஆஸ்திரேலியாவின் ஏடன் ஓ நீல் வீசிய ஃபிரீ கிக்கை தடுக்க முயன்ற எகிப்து வீரர் முகமது ஹனி, துரதிர்ஷ்டவசமாக தனது சொந்த கோல் கம்பத்திற்குள்ளேயே பந்தை அனுப்பி சுயகோல் அடித்தார். இதன் மூலம் நடப்பு உலகக் கோப்பையில் 2 சுயகோல் அடித்த 2-வது வீரர் என்ற தேவையற்ற சாதனையை ஹனி படைத்தார். இதனால் ஆட்டம் 1-1 என சமநிலையை எட்டியது.

கூடுதல் நேரத்தின் இறுதி வரை இரு அணிகளும் கோல் அடிக்காததால் வெற்றியாளரைத் தீர்மானிக்க பெனால்டி ஷூட்-அவுட் முறை வழங்கப்பட்டது. அப்போது ஆஸ்திரேலிய பயிற்சியாளர் டோனி போபோவிக், சிறப்பாக விளையாடிய இளம் கோல்கீப்பர் பேட்ரிக் பீச்சை மாற்றிவிட்டு, அனுபவ வீரரான மேத்யூ ரயானை பெனால்டி ஷூட்-அவுட்டை எதிர்கொள்ள களம் இறக்கினார். ஆனால், இந்த உத்தி பலனளிக்கவில்லை.

ஷூட்-அவுட்டில் எகிப்து தரப்பில் முகமது சாபர், ரமி ரபியா, முகமது சாலா, ஹோசம் அப்தெல்மகித் ஆகியோர் தங்களது வாய்ப்புகளைத் தவறின்றி கோலாக மாற்றினர். இதில் முகமது சாலா அடித்த 'பானென்கா' கோல் ரசிகர்களை வெகுவாகக் கவர்ந்தது.

மெஸ்ஸி அணிக்கு மரண பயத்தை காட்டிய கேப் வெர்டே.. அர்ஜென்டினா போராடி வெற்றி!

ஆஸ்திரேலிய தரப்பில் ஹாரி சௌட்டர் மற்றும் 18 வயதான லூகாஸ் ஹெரிங்டன் ஆகியோர் தங்களது பெனால்டி வாய்ப்புகளைத் தவறவிட்டனர். ஹோசம் அப்தெல்மகித் கடைசி பெனால்டி வாய்ப்பை கோலாக மாற்றியவுடன் எகிப்து ரசிகர்கள் மைதானத்தில் திரண்டு பெரும் கொண்டாட்டத்தில் ஈடுபட்டனர். இதனால் எகிப்து அணி 4-2 என்ற கணக்கில் வெற்றி பெற்றது. இந்த வரலாற்று வெற்றியின் மூலம் எகிப்து அணி தனது அடுத்த ரவுண்ட் ஆஃப் 16 சுற்றில் பலம் வாய்ந்த அர்ஜென்டினா அணியை எதிர்கொள்ளத் தகுதி பெற்றுள்ளது.