பெங்களூரு காளையை அடக்கிய தமிழ் தலைவாஸ்.. 'சூப்பர் 10' அடித்து தெறிக்கவிட்ட அர்ஜுன் தேஷ்வால்

ஜெய்ப்பூர்: 2025 புரோ கபடி லீக் (PKL) தொடரில், ஜெய்ப்பூரில் நடந்த தமிழ் தலைவாஸ் மற்றும் பெங்களூரு புல்ஸ் அணிகள் மோதிய ஆட்டம், கடைசி நிமிடம் வரை அனல் பறந்தது. இறுதியில், 'ரைடு மெஷின்' அர்ஜுன் தேஷ்வால்லின் அபாரமான 'சூப்பர் 10' உதவியுடன், தமிழ் தலைவாஸ் அணி 35-29 என்ற புள்ளிக் கணக்கில் பெங்களூரு புல்ஸை வீழ்த்தி, அவர்களின் தொடர் வெற்றிப் பயணத்திற்கு முற்றுப்புள்ளி வைத்தது.

பெரும் எதிர்பார்ப்புக்கு மத்தியில் தொடங்கிய இந்த தென் இந்திய டெர்பி போட்டியின் முதல் பத்து நிமிடங்கள், இரு அணிகளும் சளைக்காமல் மோதிக்கொண்டன. தமிழ் தலைவாஸ் அணிக்கு அர்ஜுன் தேஷ்வால் தனது வேகமான ரைடுகள் மூலம் புள்ளிகளைக் குவிக்க, டிஃபென்ஸில் ரோனக் சிறப்பான டேக்கிள்களைச் செய்தார். இதனால், தலைவாஸ் அணி இரண்டு புள்ளிகள் முன்னிலை வகித்தது.

ஆனால், பெங்களூரு புல்ஸ் அணி எளிதில் விட்டுக்கொடுப்பதாக இல்லை. அலிர்சா மிர்சாயன் மற்றும் அஹ்மத் ரசா அஸ்காரி ஆகியோர் முக்கியமான புள்ளிகளை எடுத்து, தங்கள் அணியைப் போட்டியில் நிலைநிறுத்தினர். முதல் பாதியின் இரண்டாம் கட்டத்தில், ஆட்டத்தின் போக்கு முழுமையாக பெங்களூரு புல்ஸ் பக்கம் திரும்பியது. அலிர்சாவின் மிரட்டலான ரைடுகள், குறிப்பாக அவர் பெற்றுத் தந்த ஒரு 'ஆல் அவுட்', ஆட்டத்தின் திருப்புமுனையாக அமைந்தது.

கணேஷா ஹனமந்தகோல் மற்றும் யோகேஷ் ஆகியோரின் சிறப்பான ஆட்டத்தால், தமிழ் தலைவாஸ் அணி திணறியது. முதல் பாதி முடிவில், பெங்களூரு புல்ஸ் அணி 20-14 என்ற கணக்கில் வலுவான முன்னிலையுடன் ஆதிக்கம் செலுத்தியது.

இரண்டாம் பாதியில் தமிழ் தலைவாஸின் 'கம்பேக்':

இரண்டாம் பாதி தொடங்கியதும், தமிழ் தலைவாஸ் அணி மூன்று புள்ளிகளை விரைவாக எடுத்து, மீண்டு வந்தது. பெங்களூரு புல்ஸ் அணி அலிர்சாவின் மூலம் மீண்டும் முன்னிலையைத் தக்கவைக்க முயன்றாலும், மறுமுனையில் தமிழ் தலைவாஸ் கேப்டன் அர்ஜுன் தேஷ்வால் அசுர அவதாரம் எடுத்தார்.

தொடர்ச்சியாக ஆக்ரோஷமான ரைடுகளை மேற்கொண்ட அர்ஜுன், பெங்களூரு புல்ஸ் அணியை ஒரே ஒரு வீரராகக் குறைத்ததுடன், இந்த சீசனில் தனது மற்றுமொரு 'சூப்பர் 10' சாதனையை நிறைவு செய்தார். இதைத் தொடர்ந்து, அலிர்சாவை நிதேஷ் குமார் மடக்கிப் பிடிக்க, தமிழ் தலைவாஸ் அணி, பெங்களூரு புல்ஸை 'ஆல் அவுட்' ஆக்கி, ஏற்ற இறக்கங்கள் நிறைந்த இந்த ஆட்டத்தில் மீண்டும் முன்னிலையைப் பெற்றது.

நரேந்தர் கண்டோலாவின் மேஜிக் டேக்கிள்:

ஆட்டத்தின் இறுதி நிமிடங்கள் இருந்தபோது, இரு அணிகளும் புள்ளிகளைப் பெறப் போராடின. பெங்களூரு புல்ஸ் அணி, கணேஷா மற்றும் அலிர்சாவின் ரைடுகள் மூலம் வித்தியாசத்தை மூன்று புள்ளிகளாகக் குறைத்து, போட்டிக்கு மீண்டும் உயிர் கொடுத்தது. அப்போதுதான் அந்தத் தருணம் நிகழ்ந்தது. பெங்களூரு புல்ஸின் கடந்த வெற்றிக்கு நாயகனாக இருந்த கணேஷா ஹனமந்தகோலை, ஒரு மிக முக்கியமான தருணத்தில் நரேந்தர் கண்டோலா டேக்கிள் செய்து வீழ்த்தினார்.

இந்த ஒற்றை டேக்கிள், போட்டியின் முடிவையே தீர்மானித்தது. இறுதியில், தமிழ் தலைவாஸ் அணி 35-29 என்ற கணக்கில் ஆறு புள்ளிகள் வித்தியாசத்தில் ஒரு திரில் வெற்றியைப் பதிவு செய்து, ரசிகர்களை ஆனந்தத்தில் ஆழ்த்தியது. தமிழ் தலைவாஸ் அணி அடுத்தடுத்து இரண்டு வெற்றிகளை பெற்று நம்பிக்கையை பெற்று இருக்கிறது.