ஆஸ்திரேலிய ஓபன்: செரினா வில்லியம்சுக்கு அதிர்ச்சி தோல்வியை பரிசளித்து பட்டம் வென்றார் கெர்பர்

மெல்போர்ன்: ஆஸ்திரேலிய ஓபன் டென்னிஸ் போட்டித்தொடரின் இறுதி போட்டியில், உலகின் நம்பர்-1 வீராங்கனையும், நடப்பு சாம்பியனுமான, செரினா வில்லியம்ஸ், ஜெர்மனியின் 28 வயதாகும், இளம் வீராங்கனை ஏஞ்சலிக் கெர்பரிடம் அதிர்ச்சி தோல்வியடைந்தார்.

ஆஸ்திரேலிய ஓபன் டென்னிஸ் மகளிர் ஒற்றையர் இறுதி போட்டி மெர்போர்னில் இன்று நடைபெற்றது. பெரிய போட்டித்தொடர் ஒன்றில் இதுவரை பட்டம் வெல்லாதவர் கெர்பர் என்பதால், தொடர்ச்சியாக 6 முறை ஆஸ்திரேலிய ஓபனை வென்று, நடப்பு சாம்பியனாக விளங்கும் செரினா எளிதாக வெற்றிக்கொடி நாட்டுவார் என ரசிகர்கள் எதிர்பார்த்தனர்.

ஆனால், கெர்பர் முதல் செட்டை 6-4 என்ற கணக்கில் வென்று அசத்தியபோது, அவர் மீது நம்பிக்கை துளிர்விட்டது. ஆனால், இரண்டாவது செட்டை 3-6 என்ற கணக்கில் செரினா வென்றபோது, அந்த நம்பிக்கை குறைந்தது. இதையடுத்து 3வது செட் மிகவும் பரபரப்பாக எதிர்பார்க்கப்பட்டது. இதில் 6-4 என்ற கணக்கில், கெர்பர் வெற்றி பெற்று பட்டத்தை வென்று அசத்தினார்.