AUS Open: "என்னை ஓய்வு பெறச் சொன்னவர்களுக்கு நன்றி.. அதுதான் எனக்கு பூஸ்ட்".. ஜோகோவிச் அதிரடி

மெல்போர்ன்: 2026 ஆஸ்திரேலிய ஓபன் டென்னிஸ் தொடரின் அரையிறுதி ஆட்டத்தில் வரலாற்றுச் சிறப்புமிக்க வெற்றியைப் பதிவு செய்துள்ளார் செர்பிய நட்சத்திரம் நோவக் ஜோகோவிச். 38 வயதான அவர், தன்னை விமர்சித்தவர்களுக்குத் தனது டென்னிஸ் ராக்கெட் மூலம் தகுந்த பதிலடி கொடுத்துள்ளார். இறுதிப்போட்டிக்கு முன்னேறியதன் மூலம், 25வது கிராண்ட் ஸ்லாம் பட்டத்தை வெல்லும் முனைப்பில் உள்ளார்.

5 மணி நேரப் போராட்டம்

மெல்போர்னில் நடைபெற்ற மிகவும் விறுவிறுப்பான அரையிறுதி ஆட்டத்தில், உலகின் இரண்டாம் நிலை வீரரும், நடப்பு சாம்பியனுமான இத்தாலியின் ஜானிக் சினரை ஜோகோவிச் எதிர்கொண்டார். சுமார் 5 மணி நேரம் 30 நிமிடங்கள் நீடித்த இந்த மாரத்தான் ஆட்டம் நள்ளிரவு வரை சென்றது.

இளம் வீரரான சின்னர் கடும் நெருக்கடி கொடுத்தாலும், தனது அனுபவ ஆட்டத்தால் ஜோகோவிச் சமாளித்தார். 5 செட்கள் வரை நீண்ட இந்தத் திரில்லான ஆட்டத்தில் ஜோகோவிச் வெற்றி பெற்று இறுதிப்போட்டிக்குள் நுழைந்தார். இதற்கு முன் நடந்த 5 போட்டிகளிலும் ஜோகோவிச்சை சின்னர் வீழ்த்தியிருந்த நிலையில், அந்தத் தோல்விப் பயணத்திற்கு ஜோகோவிச் முற்றுப்புள்ளி வைத்துள்ளார்.

விமர்சகர்களுக்கு நன்றி

வெற்றிக்குப் பின் பேசிய ஜோகோவிச், தன் ஓய்வு குறித்துப் பேசியவர்களுக்குப் பதிலடி கொடுத்தார். "நான் என் மீது வைத்திருந்த நம்பிக்கையை ஒருபோதும் இழக்கவில்லை. கடந்த சில ஆண்டுகளாகப் பல நிபுணர்கள் என்னை ஓய்வு பெறுமாறு கூறி வந்தனர். என் காலம் முடிந்துவிட்டதாகக் கூறினார்கள்.

என்னை ஓய்வு பெறச் சொன்ன அத்தனை பேருக்கும் நான் நன்றி தெரிவித்துக் கொள்கிறேன். ஏனெனில் அவர்களின் விமர்சனங்கள் தான் எனக்குக் கூடுதல் பலத்தையும், அவர்களைத் தவறென்று நிரூபிப்பதற்கான ஊக்கத்தையும் அளித்தது. இந்த வெற்றி எனக்கு ஆச்சரியம் அளிக்கவில்லை, இது நான் எதிர்பார்த்ததுதான்" என்று கம்பீரமாகத் தெரிவித்தார்.

சின்னரின் பாராட்டு

தோல்வி அடைந்தாலும் ஜோகோவிச்சை ஜானிக் சின்னர் பாராட்டத் தவறவில்லை. "நாங்கள் ஒருவரை ஒருவர் நன்கு அறிவோம். அவர் 24 கிராண்ட் ஸ்லாம் வென்றவர். பல ஆண்டுகளாகச் சிறந்த வீரராகத் திகழ்கிறார். அவரிடம் இருந்து நான் கற்றுக்கொள்ள வேண்டியது நிறைய உள்ளது" என்று சின்னர் கூறினார்.

இறுதிப்போட்டியில் அல்காரஸ்

ஞாயிற்றுக்கிழமை நடைபெறும் இறுதிப்போட்டியில் நோவக் ஜோகோவிச், ஸ்பெயின் நாட்டின் இளம் புயல் கார்லோஸ் அல்காரஸை எதிர்கொள்கிறார். அல்காரஸ் மற்றொரு அரையிறுதியில் ஸ்வெரேவை வீழ்த்தி இறுதிப்போட்டிக்கு வந்துள்ளார். 25வது கிராண்ட் ஸ்லாம் பட்டத்தை வென்று ஜோகோவிச் வரலாறு படைப்பாரா அல்லது அல்காரஸ் தடுப்பாரா என்பதைப் பொறுத்திருந்து பார்க்கலாம்.