“இனி சிஎஸ்கே-வின் அணியில் ஆட முடியாது”.. மும்பை இந்தியன்ஸ் பயிற்சியாளரான மறுநாளே பொல்லார்ட் முடிவு

சென்னை: 2027 ஐபிஎல் தொடருக்கான மும்பை இந்தியன்ஸ் அணியின் புதிய தலைமைப் பயிற்சியாளராக நியமிக்கப்பட்ட அடுத்த 24 மணி நேரத்திற்குள், சென்னை சூப்பர் கிங்ஸ் நிர்வாகத்திற்குச் சொந்தமான ஜோபர்க் சூப்பர் கிங்ஸ் அணியிலிருந்து வெஸ்ட் இண்டீஸ் முன்னாள் வீரர் கீரன் பொல்லார்ட் அதிரடியாக விலகியுள்ளார். தென்னாப்பிரிக்காவில் நடைபெறும் எஸ்ஏ20 லீக் தொடரில் தான் விளையாடப் போவதில்லை என்று அவர் ஜோபர்க் சூப்பர் கிங்ஸ் அணி நிர்வாகத்திற்குத் தெரிவித்து விட்டார். பொல்லார்ட்டின் இந்த அதிரடி முடிவு கிரிக்கெட் உலகை உற்றுநோக்க வைத்துள்ளது.

கடந்த அக்டோபர் 7 அன்று நடைபெற்ற எஸ்ஏ20 தொடருக்கான வீரர்கள் ஏலத்தில், ஜோஹன்னஸ்பர்க் சூப்பர் கிங்ஸ் அணி பொல்லார்ட்டை 1.5 மில்லியன் தென்னாப்பிரிக்க ராண்ட் கொடுத்து போட்டி போட்டு வாங்கியிருந்தது. அதனால் மும்பை இந்தியன்ஸ் அணியின் பேட்டிங் பயிற்சியாளர் சிஎஸ்கே குழும அணியில் விளையாடப் போகிறார் என்பது கிரிக்கெட் உலகின் தலைப்பு செய்தியாக மாறி இருந்தது.

ஆனால் அக்டோபர் 24 அன்று மும்பை இந்தியன்ஸ் அணியின் தலைமைப் பயிற்சியாளராக அவர் அறிவிக்கப்பட்டார். பதவி ஏற்ற அடுத்த நாளே சிஎஸ்கே குழும அணிக்கு விளையாட முடியாது என்று அவர் ஒதுங்கிவிட்டார். இதனை உறுதி செய்துள்ள சிஎஸ்கே தலைமை நிர்வாக அதிகாரி காசி விஸ்வநாதன், பொல்லார்ட்டிற்குப் பதிலாக மாற்று வீரரைத் தேடி வருவதாகக் கூறியுள்ளார்.

ஐபிஎல் களத்தில் மும்பை இந்தியன்ஸ் அணியின் பயிற்சியாளராகப் பணியாற்றிக்கொண்டு, தென்னாப்பிரிக்காவில் அதன் பரம எதிரியான சிஎஸ்கே அமைப்பின் அணிக்காக களம் இறங்குவது மிகப்பெரிய தர்மசங்கடத்தை ஏற்படுத்தும் என்பதால் பொல்லார்ட் இந்த முடிவை எடுத்துள்ளார். மேலும் மும்பை இந்தியன்ஸ் உரிமையாளர்களும் தென்னாப்பிரிக்காவில் எம்ஐ கேப்டவுன் என்ற தனி அணியை நடத்தி வருகின்றனர். இதனால் தேவையற்ற விவாதங்களைத் தவிர்க்கவும், 5 முறை சாம்பியனான மும்பை இந்தியன்ஸ் அணியை மீண்டும் கட்டமைக்கும் பணியில் முழுமையாக ஈடுபடவும் அவர் முடிவு செய்துள்ளார்.

பாகிஸ்தான் தோற்றுவிட்டது என கொண்டாடிய இங்கிலாந்து வீரர்கள்.. உடனே தீர்ப்பை மாற்றிய அம்பயர்!

மும்பை இந்தியன்ஸ் அணியின் பயிற்சியாளராக இருந்த மகிளா ஜெயவர்தனே விலகியதைத் தொடர்ந்து, பேட்டிங் பயிற்சியாளராக இருந்த 39 வயதான பொல்லார்ட் தலைமைப் பொறுப்புக்கு உயர்த்தப்பட்டுள்ளார். வீரராக 5 முறை ஐபிஎல் கோப்பையை வென்ற பொல்லார்ட், மும்பை அணி மீது கொண்டுள்ள விசுவாசத்தைக் காட்டும் வகையில் சிஎஸ்கே அணியை நிராகரித்துள்ளார். எஸ்ஏ20 தொடரின் 5-வது சீசன் வரும் 2027 ஜனவரி 17 முதல் தொடங்க உள்ள நிலையில், இந்த அதிரடி முடிவு வெளியாகியுள்ளது.