மீண்டும் மீண்டுமா? சிஎஸ்கே ஸ்டார் வீரர் ஆயுஷ் மாத்ரே காயம்.. ஐபிஎல் போட்டியில் பங்கேற்பாரா?

மும்பை: ரஞ்சி கோப்பை 2026-27 தொடரின் முதல் போட்டியில், சென்னை சூப்பர் கிங்ஸ் அணியின் இளம் பேட்டரும் மும்பை அணியின் துணைக்கப்பலுமான ஆயுஷ் மாத்ரேவுக்கு மீண்டும் காயம் ஏற்பட்டுள்ளது. மும்பை வான்கடே மைதானத்தில் நடைபெற்ற சண்டிகர் அணிக்கு எதிரான இந்த போட்டியில், மும்பை அணி இன்னிங்ஸ் மற்றும் 155 ரன்கள் வித்தியாசத்தில் அபார வெற்றி பெற்றபோதிலும், ஆயுஷ் மாத்ரேவுக்கு ஏற்பட்டுள்ள இந்த காயம் அணிக்கு பின்னடைவை ஏற்படுத்தியுள்ளது.

இப்போட்டியின் போது ஆயுஷ் மாத்ரேவின் வலது தொடை தசையில் 'கிரேடு 4' தசை நார் கிழிசல் ஏற்பட்டுள்ளது மருத்துவ பரிசோதனையில் உறுதி செய்யப்பட்டுள்ளது. இதன் காரணமாக அவர் குறைந்தது 4 முதல் 6 வாரங்கள் வரை போட்டிகளில் இருந்து விலக வேண்டிய சூழல் ஏற்பட்டுள்ளது.

மும்பை அணி தனது முதல் இன்னிங்ஸில் 429 ரன்கள் எடுத்து ஆட்டமிழந்த நிலையில், விக்கெட்டுகளுக்கு இடையே ரன் ஓடும்போது ஆயுஷ் மாத்ரேவுக்கு இந்த காயம் ஏற்பட்டது. இதனால் சண்டிகர் அணியின் இரண்டு இன்னிங்ஸ்களின் போதும் அவர் ஃபில்டிங்கில் ஈடுபடவில்லை. இப்போட்டியில் யஷஸ்வி ஜெய்ஸ்வாலுடன் தொடக்க ஆட்டக்காரராக களமிறங்கிய அவர் 48 ரன்கள் சேர்த்தார்.

விராட் கோலி போன்ற ஒரு தனி வீரரால் இந்திய அணிக்கு உலககோப்பையை வென்று தர முடியாது.. கையிப் அட்வைஸ்

போட்டி முடிவடைந்த பின்னர் இது குறித்து பேசிய மும்பை அணியின் கேப்டன் சித்தேஷ் லாட் "அவர் மீண்டும் அணியில் இணைய சிறிது காலம் ஆகும் என்று தெரிகிறது. போட்டியில் அவர் மைதானத்தில் நொண்டி நடந்த விதத்தைப் பார்க்கும்போது, இரண்டாவது அல்லது மூன்றாவது போட்டியில் அவர் விளையாடுவது கடினம் என்றே தோன்றுகிறது. விக்கெட்டுகளுக்கு இடையே இரண்டாவது ரன் எடுக்க முயன்றபோதே அவருக்கு தொடை தசையில் அசௌகரியம் ஏற்பட்டது" என்று தெரிவித்தார்.

முன்னதாக, ஐபிஎல் 2026 தொடரில் சன்ரைசர்ஸ் ஹைதராபாத் அணிக்கு எதிரான போட்டியின்போதும் ஆயுஷ் மாத்ரேவுக்கு இதேபோன்ற தொடை தசை காயம் ஏற்பட்டது. இதனால் தொடரின் பாதியிலேயே விலகிய அவர், தேசிய சிறப்பு மையத்தில் மூன்று மாதங்கள் தீவிர சிகிச்சைக்குப் பின்னரே ரஞ்சி கோப்பை போட்டியில் பங்கேற்க அனுமதி பெற்றார்.

நடப்பு உள்நாட்டு சீசனின் தொடக்கத்திலேயே மும்பை அணி சந்திக்கும் இரண்டாவது காயம் இதுவாகும். ரஞ்சி கோப்பை தொடங்குவதற்கு முன்னதாக நடைபெற்ற பயிற்சி ஆட்டத்தின் போது, மூத்த ஆல்ரவுண்டர் ஷர்துல் தாக்கூருக்கு விரலில் முறிவு ஏற்பட்டு முதல் கட்ட போட்டிகளிலிருந்து விலகினார்.

19 வயதான ஆயுஷ் மாத்ரேவுக்கு 2026-ஆம் ஆண்டு பல ஏற்ற இறக்கங்கள் நிறைந்ததாக அமைந்தது. ஜனவரி-பிப்ரவரி மாதங்களில் ஜிம்பாப்வேயில் நடைபெற்ற 19 வயதுக்குட்பட்டோருக்கான உலகக் கோப்பையில் இந்திய அணியை தலைமைதாங்கி கோப்பையை வென்று கொடுத்தார். பின்னர் ஐபிஎல் 2026 தொடரில் சிஎஸ்கே அணிக்காக சிறப்பான ஆட்டத்தை வெளிப்படுத்தினார்.

Also Read

IPL 2027: டெல்லி அணிக்கு கிடைத்த அற்புத பரிசு.. கங்குலியுடன் இணைந்த யுவராஜ் சிங்

தற்போது காயத்தால் பாதிக்கப்பட்டுள்ள ஆயுஷ் மாத்ரே, வரும் டிசம்பர் 14 அன்று தொடங்கவுள்ள 2026-27 விஜய் ஹசாரே கோப்பை தொடருக்குள் குணமடைந்து மீண்டும் களமிறங்குவார் என எதிர்பார்க்கப்படுகிறது.