1 ரன்னில் இரட்டை சதம் மிஸ்.. ஆட்டத்தையே மாற்றிய தேவ்தத் படிக்கல்.. நியூசிலாந்து மண்ணில் அபார ஆட்டம்

லிங்கன்: நியூசிலாந்து ஏ அணிக்கு எதிரான முதல் அதிகாரப்பூர்வமற்ற டெஸ்ட் போட்டியில், இந்திய ஏ அணி படுதோல்வியின் விளிம்பில் நின்ற நிலையில், தேவ்தத் படிக்கல் 199 ரன்கள் விளாசி ஆட்டத்தின் போக்கையே தலைகீழாக மாற்றியுள்ளார். நடுவரின் சர்ச்சைக்குரிய தீர்ப்பால் வெறும் 1 ரன்னில் தனது இரட்டை சதத்தை நழுவவிட்ட போதிலும், தோற்க வேண்டிய போட்டியை இந்திய அணியின் வெற்றிப் பாதையாக மாற்றிய அவரது ஆட்டம் ரசிகர்களை திரும்பிப் பார்க்க வைத்துள்ளது.

லிங்கனில் நடைபெற்று வரும் இந்தப் போட்டியின் முதல் இன்னிங்ஸில் இந்திய ஏ அணி வெறும் 113 ரன்களுக்குச் சுருண்டது. பதிலுக்கு விளையாடிய நியூசிலாந்து ஏ அணி 317 ரன்கள் குவித்து, 204 ரன்கள் என்ற பெரிய முன்னிலையைப் பெற்றது. பின்னர் 2-வது இன்னிங்ஸைத் தொடங்கிய இந்திய ஏ அணி, கே.எல். ராகுல் 4 ரன்னிலும், யஷஸ்வி ஜெய்ஸ்வால் சொற்ப ரன்னிலும் ஆட்டமிழக்க, 10 ரன்களுக்கு 2 விக்கெட்டுகளை இழந்து இன்னிங்ஸ் தோல்வி பயத்தில் நடுங்கியது. வேகப்பந்து வீச்சை சமாளிக்க முடியாமல் தொடக்க பேட்டர்கள் மீண்டும் சரணடைந்தனர்.

அந்த இக்கட்டான நேரத்தில் 3-வது வரிசையில் களம் இறங்கிய தேவ்தத் படிக்கல், தமிழக வீரர் சாய் சுதர்சனுடன் கைகோர்த்து நியூசிலாந்து பந்துவீச்சை துவம்சம் செய்தார். பொறுமையையும் ஆக்ரோஷத்தையும் சரிவிகிதத்தில் கலந்த இந்த ஜோடி, 3-வது விக்கெட்டுக்கு 215 ரன்கள் பார்ட்னர்ஷிப் அமைத்து ஆட்டத்தை இந்தியாவின் பக்கம் திருப்பியது. சாய் சுதர்சன் 91 ரன்களில் ஆட்டமிழந்தார். பின்னர் யாஷ் ரத்தோட்டுடன் (66 ரன்கள்) ஜோடி சேர்ந்த படிக்கல், 5-வது விக்கெட்டுக்கு 142 ரன்களைக் குவித்து மலைக்க வைத்தார்.

பாகிஸ்தான் தோற்றுவிட்டது என கொண்டாடிய இங்கிலாந்து வீரர்கள்.. உடனே தீர்ப்பை மாற்றிய அம்பயர்!

களத்தில் நங்கூரமாக நின்ற படிக்கல் 248 பந்துகளில் 24 பவுண்டரிகள் மற்றும் 3 சிக்சர்களுடன் 199 ரன்கள் குவித்திருந்த போது, பந்து பேடில் பட்ட நிலையிலும் நடுவர் தவறாக அவுட் கொடுத்ததால் 1 ரன்னில் இரட்டை சதம் நழுவியது. எனினும், இவரது இந்த இன்னிங்ஸால் இந்திய ஏ அணி 377/5 ரன்களைக் குவித்து, 173 ரன்கள் முன்னிலை பெற்று போட்டியில் ஆதிக்கம் செலுத்தும் நிலைக்கு சென்றது. டெஸ்ட் தொடருக்கு முன்பாக தேவ்தத் படிக்கல் அடித்த இந்த ரன்கள் இந்திய அணி நிர்வாகத்திற்குப் பெரும் தெம்பைத் தந்துள்ளது.

Also Read

“இனி சிஎஸ்கே-வின் அணியில் ஆட முடியாது”.. மும்பை இந்தியன்ஸ் பயிற்சியாளரான மறுநாளே பொல்லார்ட் முடிவு