IND vs NZ: அபிஷேக் சர்மா கேட்ச் ஆகி அவுட்.. கடைசியில் நடுவர் கொடுத்த டிவிஸ்ட்

கிறைஸ்ட்சர்ச்: நியூசிலாந்துக்கு எதிராக நடைபெற்று வரும் இரண்டாவது டி20 போட்டியில், இந்திய அணி தொடக்க வீரர் அபிஷேக் சர்மா கேட்ச் ஆன நிலையில், அது நோ பால் என அறிவிக்கப்பட்டதால் தப்பித்தார். வெற்றி பெற 181 ரன்கள் இலக்காக நிர்ணயிக்கப்பட்டுள்ளது. டாஸ் வென்ற இந்திய அணியின் கேப்டன் ஸ்ரேயாஸ் ஐயர் முதலில் பந்துவீச்சைத் தேர்வு செய்தார். அதன்படி முதலில் பேட்டிங் செய்த நியூசிலாந்து அணி நிர்ணயிக்கப்பட்ட 20 ஓவர்களில் 5 விக்கெட் இழப்பிற்கு 180 ரன்கள் குவித்தது.

ஆட்டத்தின் தொடக்கத்தில் நியூசிலாந்து அணி 41 ரன்களுக்குள் 3 விக்கெட்டுகளை இழந்து தடுமாறியது. இருப்பினும், கிளென் பிலிப்ஸ் மற்றும் பிவோன் ஜேக்கப்ஸ் ஜோடி சேர்ந்து 4வது விக்கெட்டுக்கு 116 ரன்கள் குவித்து அணியை மீட்டெடுத்தது. இந்திய பந்துவீச்சில் அர்ஷ்தீப் சிங் 2 விக்கெட்டுகளை வீழ்த்தினார்.

இதன் மூலம் 2026 ஆம் ஆண்டில் சர்வதேச டி20 போட்டிகளில் 38 விக்கெட்டுகளைக் கைப்பற்றி, ஒரு ஆண்டில் அதிக டி20 விக்கெட்டுகளை வீழ்த்திய இந்திய பந்துவீச்சாளர் என்ற புவனேஷ்வர் குமாரின் சாதனையை அர்ஷ்தீப் சிங் முறியடித்தார். நிதிஷ் குமார் ரெட்டி, பிரின்ஸ் யாதவ் மற்றும் புவனேஷ்வர் குமார் தலா ஒரு விக்கெட் எடுத்தனர்.

IND vs NZ: என்ன டம்மினு நினைச்சியா? பிரின்ஸ் யாதவால் நியூசிலாந்து வீரருக்கு நிகழ்ந்த கதி

181 ரன்கள் எடுத்தால் வெற்றி என்ற இலக்குடன் இந்திய அணியின் தொடக்க ஆட்டக்காரர்களாக சஞ்சு சாம்சனும் அபிஷேக் சர்மாவும் களமிறங்கினர். மேட் ஹென்றி வீசிய முதல் ஓவரை மெய்டனாக எதிர்கொண்ட நிலையில், ஜேக்கப் டஃபி வீசிய அடுத்த ஓவரில் அபிஷேக் சர்மா கொடுத்த கேட்ச் 'நோ-பால்' என அறிவிக்கப்பட்டதால் தப்பினார்.

Also Read

IND vs NZ: திலக் வர்மா உலக சாதனை.. டி20யில் எந்த இந்திய வீரரும் செய்யாத சாதனை

அதன்பின் அதிரடியாக விளையாடிய அபிஷேக் சர்மா சிக்சர் மற்றும் பவுண்டரிகளை விளாசினார். 3.5 ஓவர்கள் முடிவில் இந்திய அணி விக்கெட் இழப்பின்றி 37 ரன்கள் எடுத்து விளையாடி வருகிறது. இந்த இன்னிங்ஸ் மூலம் அபிஷேக் சர்மா ஒரே ஆண்டில் ஆயிரம் ரன்களை கடந்தார். இதன் மூலம் சூர்யகுமார் மற்றும் இசான் கிஷனுக்கு பிறகு இந்த மைல்கல்லை எட்டிய 3வது இந்திய வீரர் என்ற பெருமையை பெற்றார்.