"உண்மை என்னவென்றே தெரியாமல் கம்பீரை திட்டுவதா?".. இஷான் கிஷன் விவகாரத்தில் கொதித்த இர்பான் பதான்

By Aravinthan

Published: Saturday, October 24, 2026, 10:04 [IST]

மும்பை: நியூசிலாந்து அணிக்கு எதிரான முதல் சர்வதேச டி20 போட்டியில் இந்திய அணியின் பேட்டிங் வரிசையை திடீரென மாற்றியதற்காக, தலைமைப் பயிற்சியாளர் கௌதம் கம்பீர் மீது சமூக வலைதளங்களில் கடுமையான விமர்சனங்கள் குவிந்தன. இந்நிலையில், கம்பீருக்கு முழு ஆதரவு தெரிவித்து இந்திய அணியின் முன்னாள் வீரர் இர்பான் பதான் களமிறங்கியுள்ளார். உண்மை நிலவரம் என்னவென்று தெரியாமல் கம்பீரைக் கண்மூடித்தனமாகத் தாக்குவதே இணையவாசிகளுக்கு முழுநேரப் பொழுதுபோக்காக மாறிவிட்டது என்று அவர் ஆவேசமாகக் கொந்தளித்துள்ளார்.

கிறைஸ்ட்சர்ச்சில் நடைபெற்ற முதல் போட்டியில் 226 ரன்களை துரத்திய போது, வழக்கமாக 3-வது இடத்தில் களமிறங்கும் அதிரடி வீரர் இஷான் கிஷனுக்குப் பதிலாக திலக் வர்மா முன்கூட்டியே களமிறக்கப்பட்டார். சுழற்பந்து வீச்சை எதிர்கொள்ளத் திணறிய திலக் வர்மா 11 பந்துகளில் 6 ரன்கள் மட்டுமே எடுத்து ஏமாற்றினார். பின்னர் 5-வது இடத்தில் இறங்கிய இஷான் கிஷனும் 1 ரன்னில் ஆட்டமிழந்தார். இதனால் ஆட்டத்தில் கடும் பதற்றம் உருவானது. கம்பீர் தனது அதிகாரத்தைப் பயன்படுத்தி தேவையில்லாத சோதனைகளைச் செய்வதாகவும், வட இந்தியா - தென் இந்தியா என பாரபட்சம் காட்டுவதாகவும் ரசிகர்கள் சமூக வலைதளங்களில் மிகக் காட்டமாக விமர்சித்தனர். திலக் வர்மா ஆந்திராவை சேர்ந்தவர் என்பதால் இந்த விமர்சனம் எழுந்தது.

IND vs NZ Irfan Pathan Defends Gautam Gambhir Over Ishan Kishan Batting Order Controversy Against New Zealand

இந்த விமர்சனங்களுக்கு முற்றுப்புள்ளி வைத்த இர்பான் பதான், உண்மையான பின்னணியை உடைத்துள்ளார். "முதல் போட்டியின் போதே இஷான் கிஷனுக்கு இடுப்புப் பகுதியில் லேசான காயம் ஏற்பட்டது. அந்தத் தசைப்பிடிப்பு வலி காரணமாகவே அவர் பின்வரிசையில் பேட்டிங் செய்ய அனுப்பப்பட்டார். ஆனால் உள்ளே என்ன நடந்தது என்றே தெரியாமல் பலரும் அவசரப்பட்டு கம்பீரை வசைபாடத் தொடங்கிவிட்டனர். கம்பீரை விமர்சிப்பதே இப்போது பலருக்கு பிடித்தமான டைம்பாஸ் ஆகிவிட்டது. கருத்து சொல்வதற்கு முன் சற்று பொறுமை காக்க வேண்டும்" என்று தனது எக்ஸ் பக்கத்தில் பதிவிட்டார்.

IND vs NZ: "வைபவ் சூர்யவன்ஷிக்கு ஓவர் பில்டப் கொடுக்காதீங்க அதனால்..".. கொதித்த பேட்டிங் கோச் கோடக்

சமூக வலைதளப் பக்கங்களில் பரபரப்பை ஏற்படுத்தி பார்வைகளை அள்ளுவதற்காக மட்டுமே ஒருவரைக் குறை கூறக்கூடாது என்று பதான் காட்டமாக எச்சரித்துள்ளார். "முழு கதையையும் தெரிந்து கொள்ளாமல் அவசரப்பட்டு எந்த முடிவிற்கும் வர வேண்டாம். சமூக வலைதளங்களில் வியூஸ்களையும் எண்களையும் கூட்டுவதற்காக அவதூறுகளைப் பரப்புவது ஒருவரை எவ்வளவு காயப்படுத்தும் என்பதை உணர்ந்து பேசுங்கள்" என்று தனது கருத்தை முன்வைத்தார்.