IND vs NZ: ரிஷப் பண்ட் உடல்தகுதி தேர்வில் தோல்வி.. டெஸ்ட் தொடரில் பங்கேற்பாரா? அடுத்தது என்ன?

மும்பை: இந்திய கிரிக்கெட் அணியின் நட்சத்திர விக்கெட் கீப்பர் பேட்டர் ரிஷப் பண்ட், பெங்களூருவில் உள்ள பிசிசிஐ-யின் சிறப்பு மையத்தில் நடைபெற்ற உடல்தகுதி தேர்வில் தேர்ச்சி பெறவில்லை. நியூசிலாந்துக்கு எதிரான இரண்டு போட்டிகள் கொண்ட டெஸ்ட் தொடருக்கு செல்வதற்கு முன்பாக, அவர் தனது உடல்தகுதியை நிரூபிக்க அடுத்த சில நாட்களில் இரண்டாவது உடல்தகுதி தேர்வுக்கு உட்படுத்தப்படுவார் எனத் தெரிகிறது.

கடந்த மாதம் ஸ்ரீநகரில் ஜம்மு காஷ்மீருக்கு எதிராக நடைபெற்ற இரானி கோப்பை போட்டியில் இதர இந்திய அணியில் விளையாடியபோது பண்டிற்கு விலா பகுதியில் தசைப்பிடிப்பு ஏற்பட்டது. அதன்பின்னர் போட்டிகளில் பங்கேற்காமல் இருந்த பண்ட், அக்டோபர் 23 முதல் மருத்துவக் குழுவின் கண்காணிப்பில் இருந்து வருகிறார்.

தற்போது அவர் பேட்டிங் மற்றும் விக்கெட் கீப்பிங் பயிற்சியைத் தொடங்கியுள்ள நிலையில், பிசிசிஐ மருத்துவக் குழு விரைவில் அவருக்கு மீண்டும் உடல்தகுதி தேர்வை நடத்தவுள்ளது.இரண்டாவது உடல்தகுதி தேர்வில் பண்ட் தேர்ச்சி பெற்றால், நவம்பர் 7 முதல் 10 வரை லிங்கனில் நடைபெறவுள்ள நியூசிலாந்து ஏ அணிக்கு எதிரான 3வது அதிகாரப்பூர்வமற்ற டெஸ்ட் போட்டியில் இந்தியா ஏ அணிக்காக விளையாடுவார் என எதிர்பார்க்கப்படுகிறது.

IND vs NZ ஒருநாள் தொடர் அட்டவணை விவரம்.. காலை எத்தனை மணிக்கு தொடக்கம்? எந்த சேனல், ஒடிடி? அணி விவரம்

இந்தியா மற்றும் நியூசிலாந்து அணிகளுக்கு இடையிலான முதலாவது டெஸ்ட் போட்டி நவம்பர் 19 அன்று வெலிங்டனில் தொடங்க உள்ளது. நியூசிலாந்து ஏ அணிக்கு எதிரான மூன்று போட்டிகளிலும் விளையாட பண்ட் தேர்வு செய்யப்பட்டிருந்தார். ஆனால் உடல்தகுதி பிரச்சனை காரணமாக முதல் இரண்டு போட்டிகளில் இருந்து விலகினார்.

அவருக்கு பதிலாக ஜார்க்கண்ட் விக்கெட் கீப்பர் குமார் குஷாக்ரா சேர்க்கப்பட்டார். ஒருவேளை பண்ட் இரண்டாவது தகுதித் தேர்விலும் தேர்ச்சி பெறாவிட்டால், நியூசிலாந்து டெஸ்ட் தொடரில் அவர் பங்கேற்பது கேள்விக்குறியாகும். அவ்வாறு அசாதாரண சூழல் ஏற்பட்டால், இந்தியா ஏ அணியை வழிநடத்தும் துருவ் ஜூரல் முதன்மை விக்கெட் கீப்பராகச் செயல்படுவார்.

Also Read

IND vs NZ: ரோகித் சர்மாவை விட இதை செய்ய கோலிக்கு தான் வாய்ப்பு அதிகம்.. புஜாரா கணிப்பு

இதற்கிடையில், நியூசிலாந்து ஏ அணிக்கு எதிரான 3வது அதிகாரப்பூர்வமற்ற டெஸ்ட் போட்டியில் வேகப்பந்து வீச்சாளர் ஜஸ்பிரித் பும்ரா இந்தியா ஏ அணிக்காக விளையாடுவார் என்று தகவல்கள் தெரிவிக்கின்றன. 2025 நவம்பருக்கு பிறகு ரெட்-பால் போட்டிகளில் விளையாடாத பும்ரா, இடைப்பட்ட காலத்தில் ஓய்வு மற்றும் காயம் காரணமாக சில தொடர்களை தவறவிட்டார். இந்நிலையில் நியூசிலாந்து டெஸ்ட் தொடருக்கு முன்னதாக போட்டி அனுபவத்தை பெற அவர் இந்த ஆட்டத்தில் களம் இறங்குவார் என எதிர்பார்க்கப்படுகிறது.