IND vs NZ: வைபவ் சூர்யவன்ஷியை 3வது வீரராக களமிறக்குவதற்கு பதில், இந்த வீரரை சேர்த்திருக்கலாம்-முரளி

மும்பை: நியூசிலாந்துக்கு எதிரான இரண்டாவது டி20 போட்டியில் இந்திய அணி வெற்றி பெற்ற போதிலும், இளம் வீரர் வைபவ் சூர்யவன்ஷியின் பேட்டிங் வரிசை குறித்து முன்னாள் இந்திய சுழற்பந்து வீச்சாளர் முரளி கார்த்திக் கேள்வி எழுப்பியுள்ளார். சூர்யவன்ஷியை தொடக்க ஆட்டக்காரராக களமிறக்கியிருக்க வேண்டும் என்றும், நடுவரிசை பேட்டர் தேவைப்பட்டால் சிவம் துபேவை விளையாட வைத்திருக்கலாம் என்றும் அவர் கருத்து தெரிவித்துள்ளார்.

கிறிஸ்ட்சர்ச்சில் நடைபெற்ற இப்போட்டியில் நியூசிலாந்து அளித்த 181 ரன்கள் இலக்கை இந்திய அணி 4 விக்கெட்டுகள் மற்றும் ஒரு பந்து மீதமிருக்கையில் எட்டி வெற்றி பெற்றது. இந்த சேஸிங்கில் சூர்யவன்ஷி 8 பந்துகளில் 4 ரன்கள் மட்டுமே எடுத்து ஆட்டமிழந்தார்.

இது குறித்து பேசிய முரளி கார்த்திக், அபிஷேக் சர்மாவுடன் சூர்யவன்ஷி தொடக்க வீரராக களமிறக்கப்பட்டிருக்க வேண்டும் என்றும், சஞ்சு சாம்சன் 3-ஆம் இடத்தில் பேட்டிங் செய்திருக்கலாம் என்றும் கூறினார்.

IND vs NZ: அபிஷேக் சர்மா கேட்ச் ஆகி அவுட்.. கடைசியில் நடுவர் கொடுத்த டிவிஸ்ட்

"வைபவ் சூர்யவன்ஷி எந்த இடத்தில் சிறப்பாக விளையாடுவார்? அவர் ஒரு தொடக்க ஆட்டக்காரர். நடுவரிசையில் அவர் விளையாடியது இல்லை. அவர் ஒரு இளம் வீரர், ஒரே பாணியில் மட்டுமே பேட்டிங் செய்து பழகியவர். அனுபவம் வாய்ந்த வீரர்கள் வெவ்வேறு ரோல்களை ஏற்க முடியும் என்பதற்காகவே அணியில் சேர்க்கப்படுகிறார்கள்."

"நீங்கள் போட்டியில் வெற்றி பெற்றது வேறு விஷயம், ஆனால் சூர்யவன்ஷியை விளையாட வைக்கிறீர்கள் என்றால், அவர் தொடக்க ஆட்டக்காரராகவே களமிறங்கியிருக்க வேண்டும். சஞ்சு சாம்சன் அனுபவம் வாய்ந்த பேட்டர். அவரால் வேறு வரிசையிலும் விளையாட முடியும். குறிப்பாக வைபவ் சூர்யவன்ஷி தேர்வு செய்யப்பட்டிருக்கும் போது, மூத்த வீரரான சாம்சன் இதுபோன்ற பொறுப்புகளை ஏற்க வேண்டும். சூர்யவன்ஷி விளையாடவில்லை என்றால் நிலைமையே வேறு, அப்போது நடுவரிசையில் ஆட சிவம் துபேவை சேர்த்திருக்கலாம்" என்றும் சுட்டிக்காட்டினார்.

இப்போட்டியில் சஞ்சு சாம்சன் மற்றும் அபிஷேக் சர்மா ஜோடி முதல் விக்கெட்டுக்கு 40 ரன்கள் சேர்த்தது. சாம்சன் ஆட்டமிழந்த பிறகு களமிறங்கிய சூர்யவன்ஷி, நாதன் ஸ்மித் பந்துவீச்சில் எக்ஸ்ட்ரா கவர் திசையில் டேரில் மிட்செலிடம் கேட்ச் கொடுத்து ஆட்டமிழந்தார்.

முரளி கார்த்திக்கின் இந்த கருத்தை முன்னாள் இந்திய கேப்டன் அஜய் ஜடேஜாவும் ஒப்புக்கொண்டார். "அவரது கருத்தை நான் ஏற்கிறேன். ஒவ்வொரு இந்திய வீரரும் எந்த வரிசையிலும் ஆட வேண்டும் என்று எதிர்பார்க்கப்பட்டாலும், ஒரு இளம் வீரரை உருவாக்க விரும்பினால், அவரை அவரது இயல்பான இடத்திலேயே விளையாட வைக்க வேண்டும். ஏற்கனவே அவரை நீண்ட காலம் வெளியே அமர வைத்திருந்தீர்கள்" என்று அவர் தெரிவித்தார்.

Also Read

IND vs NZ: திலக் வர்மா தான் இந்திய அணியின் அடுத்த கேப்டன்.. அடித்து சொன்ன இர்பான் பதான்

மேலும் பேசிய ஜடேஜா, "ஒரு வீரரை அணியில் வளர்த்தெடுக்கும் போது அவருக்கு எளிதான வாய்ப்பை வழங்க வேண்டும். தேவைப்பட்டால் அனுபவம் வாய்ந்த வீரர்களையே கடினமான சூழ்நிலைகளில் களமிறக்க வேண்டும். சூர்யவன்ஷி தனது இயல்பான சுதந்திரத்துடன் விளையாடாவிட்டால், அவரும் மற்ற சாதாரண வீரர்களைப் போல ஆகிவிடுவார். ராஜஸ்தான் ராயல்ஸ் வீரரான சூர்யவன்ஷிக்கு 15 வயது மட்டுமே ஆகிறது. அவரை பேட்டிங் வரிசையில் மேலும் கீழும் மாற்றுவது அவர் மனதில் சந்தேகங்களை மட்டுமே உருவாக்கும்" எனக் குறிப்பிட்டார்.