"கோப்பை வெல்வது மட்டுமே வெற்றி கிடையாது".. இந்திய மண்ணில் வரலாறு படைக்கத் தவறிய ஹோப் உருக்கம்

பெங்களூர்: இந்தியா - வெஸ்ட் இண்டீஸ் அணிகளுக்கு இடையிலான 5 போட்டிகள் கொண்ட டி20 கிரிக்கெட் தொடர் 2-2 என்ற கணக்கில் சமனில் முடிவடைந்தது. பெங்களூருவில் நடைபெற இருந்த கடைசி போட்டி கனமழையால் கைவிடப்பட்டதால் கோப்பை பகிர்ந்தளிக்கப்பட்டது. இந்தத் தொடரில் 260 ரன்கள் குவித்து தொடர் நாயகன் விருதைத் தட்டிச் சென்ற வெஸ்ட் இண்டீஸ் கேப்டன் ஷாய் ஹோப், அனைத்துப் பரிசுகளையும் எடுத்துச் செல்ல தன்னிடம் போதிய பெட்டிகள் இல்லை என முன்பு கூறிய நிலையில் தற்போது தொடருக்கான கோப்பையை வெல்லாததால் "இன்னும் நிறைய பெட்டிகள் ஆகவில்லை" என சிரித்தபடியே பேசத் தொடங்கினார்.

மேலும் பேசிய அவர், "ஒரு தொடரை அல்லது கோப்பையை வெல்வது மட்டுமே வாழ்க்கையில் வெற்றி கிடையாது. ஒரு அணியாக எங்கள் வீரர்கள் ஒவ்வொரு போட்டியிலும் அடுத்த கட்டத்திற்கு முன்னேறியுள்ள விதமே எங்களுக்கு மிகப்பெரிய வெற்றியாகும். கடந்த 20 ஆண்டுகளுக்கும் மேலாக இந்தியாவில் நாங்கள் ஒரு தொடரைக்கூட வென்றதில்லை. ஆனால் இந்த முறை வரலாற்றை மாற்றும் அளவுக்கு வெற்றிக்கு மிக அருகில் வந்தோம். ஒரு கட்டமைப்பாக நாங்கள் எத்தகைய பலத்துடன் வளர்ந்து வருகிறோம் என்பதை இந்தத் தொடர் நிரூபித்துள்ளது" என்றார்.

பந்துவீச்சாளர்களை வெகுவாகப் பாராட்டிய அவர், "கடும் அழுத்தங்களுக்கு மத்தியிலும் எங்கள் பவுலர்கள் தங்களது திட்டங்களைச் சரியாகச் செயல்படுத்தினர். குறிப்பாக ஷமார் ஸ்பிரிங்கர் கடைசி ஓவர்களில் மிக அற்புதமாகப் பந்துவீசி முக்கிய விக்கெட்டுகளை எடுத்தார். கீமோ பால், ரோஸ்டன் சேஸ் ஆகியோரும் சீரான பங்களிப்பைத் தந்தனர். எங்கள் பந்துவீச்சு முன்னேற்றம் எனக்கு மிகுந்த திருப்தியைத் தருகிறது. டி20 கிரிக்கெட்டில் ரூதர்போர்டு தனது அதிரடியைத் தொடர்ந்தார். ஒட்டுமொத்தமாக அனைவரும் ஏதோ ஒரு கட்டத்தில் தங்களது பங்களிப்பை வழங்கினர்" எனக் குறிப்பிட்டார்.

"வைபவ் சூர்யவன்ஷிக்காக அவங்க 2 பேரையும் அணியில் இருந்து நீக்க முடியாது".. ஸ்ரேயாஸ் ஐயர் ஓபன் டாக்

தனது அசாத்திய ஃபார்ம் குறித்துப் பேசிய ஹோப், "எப்போதுமே என் மீது எனக்கு அசைக்க முடியாத சுயநம்பிக்கை உண்டு. முந்தைய 2, 3, 4 அல்லது 5 இன்னிங்ஸ்களில் ரன் குவிக்க முடியாமல் போனாலும், களத்தில் இறங்கும் போது என்னால் ஜெயிக்க முடியும் என்றே நினைப்பேன். முந்தைய ஆட்டத்தில் சதம் அடித்தாலும் கூட அடுத்த போட்டியில் பூஜ்ஜியத்தில் இருந்துதான் தொடங்க வேண்டும். அதனால் என் வழக்கமான திட்டத்தை நான் எப்போதுமே மாற்றுவதில்லை. நடுநிலையாக இருந்து என் திறமையை முழுமையாக நம்புவதே எனது பலம்" என்று உருக்கமாகத் தெரிவித்தார்.