"ஃபுல் டாஸ் போட்டுட்டு பிட்ச் மேல பழி சொல்வதா?".. இந்திய பவுலர்களை கிழித்துத் தொங்கவிட்ட கவாஸ்கர்

ஹைதராபாத்: வெஸ்ட் இண்டீஸ் அணிக்கு எதிரான 4-வது டி20 போட்டியில் இந்திய அணி தோல்வியடைந்ததற்கு ஆடுகளத்தைக் குறை கூறாமல், தங்களது மோசமான பந்துவீச்சை பவுலர்கள் சுயபரிசோதனை செய்ய வேண்டும் என்று கிரிக்கெட் ஜாம்பவான் சுனில் கவாஸ்கர் விளாசியுள்ளார்.

ஹைதராபாத்தில் நடைபெற்ற இந்தப் போட்டியில் வெஸ்ட் இண்டீஸ் அணி 247 ரன்கள் குவித்தது. கடின இலக்கை நோக்கி ஆடிய இந்திய அணி 223 ரன்கள் மட்டுமே எடுத்து 24 ரன்கள் வித்தியாசத்தில் தோல்வியடைந்தது. இந்திய அணியின் தலைமை பயிற்சியாளர் கவுதம் கம்பீர் தொடர்ந்து பேட்டிங்கிற்கு சாதகமான ஆடுகளங்களை விமர்சித்து வரும் நிலையில், சுனில் கவாஸ்கர் அதற்கு நேர்மாறான கருத்தைத் தெரிவித்துள்ளார்.

இது பற்றி சுனில் கவாஸ்கர் பேசுகையில், "ஆடுகளம் பந்துவீச்சாளர்களுக்கு சாதகமாக இல்லை என்று பலரும் தொடர்ந்து குற்றம் சாட்டுகின்றனர். ஆனால் பந்துவீச்சாளர்கள் தொடர்ந்து ஃபுல் டாஸ் பந்துகளாக வீசினால், அதற்கு ஆடுகளம் எப்படி பொறுப்பாகும்? பந்துவீச்சாளர்கள் சரியாக வீசாத பந்துகளுக்கு ஆடுகளத்தை குறை சொல்வது நியாயமல்ல.

திலக் வர்மா, நிதீஷ் குமார் ரெட்டி ஜோடி ஆடியபோது வெஸ்ட் இண்டீஸ் பந்துவீச்சாளர்களும் இதேபோல் ஃபுல் டாஸ்களை வீசி தவறு செய்தனர். ஆனால் கடைசி கட்டத்தில் அவர்கள் ஆடுகளத்தைப் புரிந்து கொண்டு சரியான லென்த்தில் பந்தை பிட்ச் செய்து, துல்லியமாக யார்க்கர்களை வீசியதால்தான் விக்கெட்டுகள் கிடைத்தன. ஆடுகளத்தை சரியாகப் பயன்படுத்திக் கொள்ள பவுலர்கள் பழக வேண்டும்" என்று கவாஸ்கர் சுட்டிக் காட்டினார்.

இந்தப் போட்டியில் இந்திய வேகப்பந்து வீச்சாளர்களான மயங்க் யாதவ் மற்றும் அர்ஷ்தீப் சிங் இருவரும் தலா 52 ரன்களை வாரி வழங்கினர். கேப்டன் ஸ்ரேயாஸ் ஐயரும் தங்களது பந்துவீச்சு திட்டமிடல் சரியாக அமையாததே தோல்விக்குக் காரணம் என்று போட்டி முடிந்ததும் கூறினார்.

“ஜெய்ஸ்வால் விக்கெட் கீப்பிங் செய்வதே வேஸ்ட் ஏன்னா..

தற்போது 5 போட்டிகள் கொண்ட இந்தியா - வெஸ்ட் இண்டீஸ் டி20 தொடர் 2-2 என்ற கணக்கில் சமநிலையில் உள்ளது. பெங்களூருவில் சனிக்கிழமை தொடரைத் தீர்மானிக்கும் கடைசி போட்டி நடைபெறவுள்ள நிலையில், பிட்ச் மீது பழிபோடாமல் பந்துவீச்சாளர்கள் தங்களது தவறுகளைத் திருத்திக் கொள்ள வேண்டும் என கவாஸ்கர் அறிவுறுத்தியுள்ளார்.

Also Read

"வைபவ் சூர்யவன்ஷியின் தன்னம்பிக்கையை உடைத்துவிட்டனர்".. இந்திய அணி நிர்வாகத்தை விளாசிய ஸ்ரீகாந்த்