"விளையாட்டு தர்மத்தை மீறி விட்டாய்.. ஸ்டம்பை விட்டுட்டு..".. வெஸ்ட் இண்டீஸ் பவுலரை விளாசிய கவாஸ்கர்

ஹைதராபாத்: இந்தியா - வெஸ்ட் இண்டீஸ் அணிகள் மோதிய 4வது டி20 போட்டியில் காயமடைந்த இந்திய வீரர் அர்ஷ்தீப் சிங்கின் உடலை மட்டுமே குறிவைத்து பந்துவீசிய வெஸ்ட் இண்டீஸ் வேகப்பந்து வீச்சாளர் ஷமர் ஜோசப்பின் செயலை கிரிக்கெட் ஜாம்பவான் சுனில் கவாஸ்கர் கண்டித்துள்ளார்.

ஹைதராபாத்தில் நடைபெற்ற 4-வது டி20 போட்டியின் கடைசி ஓவரில் இந்த சர்ச்சை சம்பவம் அரங்கேறியது. வெஸ்ட் இண்டீஸ் பந்துவீச்சாளர் ஷமர் ஜோசப் வீசிய அதிவேக பவுன்சர் பந்து, பேட்டிங் செய்து கொண்டிருந்த அர்ஷ்தீப் சிங்கின் தோள்பட்டையில் பலமாகத் தாக்கியது. இதனால் அவர் வலியால் துடித்தார். உடனே களத்தை விட்டு வெளியேறிவிடுமாறு கேப்டன் ஸ்ரேயாஸ் ஐயர் அறிவுறுத்தியும், அர்ஷ்தீப் சிங் தொடர்ந்து ஆட முடிவு செய்தார்.

அடுத்த பந்தில் சிக்சர் அடிப்பதற்காக அர்ஷ்தீப் சிங் ஸ்டம்புகளை விட்டு விலகி நின்றார். அப்போது மூன்று ஸ்டம்புகளும் முற்றிலும் தெளிவாக தெரிந்தது. அதை நோக்கி யார்க்கர் பந்து வீசினாலே விக்கெட்டை வீழ்த்தி விடலாம் என்ற நிலை இருந்தது. ஆனால் ஷமர் ஜோசப் எளிதாக ஸ்டம்பை நோக்கி வீசி விக்கெட் எடுப்பதை விட்டுவிட்டு, மீண்டும் வேண்டுமென்றே அர்ஷ்தீப்பின் காயம்பட்ட தோள்பட்டையைக் குறிவைத்து பவுன்சரை எறிந்தார். அதிர்ஷ்டவசமாக அந்தப் பந்து அவர் மீது படாமல் பவுண்டரி எல்லையைத் தாண்டியது.

நேரலை வர்ணனையில் இருந்த சுனில் கவாஸ்கர் இந்த செயலால் கொந்தளித்தார். "ஷமர் ஜோசப் வேண்டுமென்றே பேட்டரைத் தாக்கப் பார்க்கிறார். மூன்று ஸ்டம்புகளும் கண் முன்னே காலியாகக் கிடக்கும் போது, ஒரு பவுலர் எதற்காக பேட்டரின் உடலைக் குறிவைத்து அடிக்க வேண்டும்? இது விளையாட்டு தர்மத்திற்கே முற்றிலும் எதிரானது" என்று ஆவேசமாக விளாசினார்.

கம்பீர் செய்த மெகா தவறு.. இந்த வீரரை எடுக்காமல் விட்டதே தோல்விக்கு காரணம்.. விளாசிய வருண் ஆரோன்

அந்தப் பந்திற்குப் பிறகு வலியைத் தாங்க முடியாமல் 5 ரன்களுடன் அர்ஷ்தீப் சிங் பாதியிலேயே வெளியேறினார். இப்போட்டியில் இந்தியா 24 ரன்கள் வித்தியாசத்தில் தோல்வியடைந்து, தொடர் 2-2 என சமநிலையை எட்டியுள்ளது. பெங்களூருவில் சனிக்கிழமை இறுதிப் போட்டி நடைபெறவுள்ள நிலையில், அர்ஷ்தீப் சிங்கிற்கு ஏற்பட்டுள்ள இந்தத் தோள்பட்டை காயம் இந்திய அணிக்கு மிகப்பெரிய தலைவலியை ஏற்படுத்தியுள்ளது.