மும்பையின் கடும் போராட்டம்.. ஒரே பந்தில் அனைத்தையும் சொதப்பிய க்ருணால்.. டெல்லி த்ரில் வெற்றி!

தொடக்கமே சொதப்பல்

தொடக்க வீரர்களாக களமிறங்கிய ரோகித் சர்மா 7 ரன்களுக்கு நடையை கட்டினார். மற்றொரு தொடக்க வீரரான டிகாக் அதிரடியாக விளையாடி ஒரு பவுண்டரி மற்றும் ஒரு சிக்ஸர் அடித்தாலும், 19 ரன்களுக்கு கேட்ச் கொடுத்தார். -

37 ரன்களுக்கு 2 விக்கெட்களை இழந்து தடுமாறிய மும்பை அணியை சூர்யகுமார் யாதவ் - சௌரப் திவாரி ஆகியோர் சற்று மீட்டனர். ஆனால் அது நீடிக்கவில்லை. சூர்யகுமார் யாதவ் 33 (26), சௌரப் திவாரி 15 (18) ஆகியோர் அடுத்தடுத்து வெளியேறினர்.

குறைந்த இலக்கு

மும்பை அணியின் நம்பிக்கை வீரரான கெயீரன் பொல்லார்ட் 6 ரன்களுக்கு அவுட்டாகி அதிர்ச்சி கொடுத்தார். கடைசியில் ஹர்திக் பாண்ட்யா 11 ரன்களும், ஜெயந்த் யாதவ் 11 ரன்களும் விளாச 20 ஓவர்கள் முடிவில் மும்பை இந்தியன்ஸ் அணி 8 விக்கெட் இழப்புக்கு 129 ரன்களை எடுத்தது. டெல்லி அணி தரப்பில் அக்‌ஷர் படேல், ஆவேஷ் கான் ஆகியோர் தலா 3 விக்கெட்களும், ஆன்ரிச் நார்ட்ஜே மற்றும் அஸ்வின் ஆகியோர் ஒரு விக்கெட்டும் எடுத்தனர்.

சரிந்த மிடில் ஆர்டர்

இதையடுத்து, களமிறங்கிய டெல்லி அணியில் தொடக்க வீரர்கள் ஷிகர் தவான் 8 ரன்களில் ரன் அவுட்டானார். கெயீரன் பொல்லார்ட் வேகமாக செயல்பட்டு அந்த விக்கெட்டை எடுத்தார். ப்ரித்வி ஷா 6 ரன்களில் எல்பிடபிள்யூ ஆனார். பொறுப்புடன் ஆட வேண்டிய ஸ்டீவன் ஸ்மித் 9 ரன்களிலும் வெளியேறினார். இதனால் அந்த அணி 30 ரன்களுக்கு 3 விக்கெட்களை இழந்து தடுமாறியது. இதன் பின்னர் வந்த பண்ட் 26 ரன்கள், அக்‌ஷர் 9 ரன்கள், ஹெட்மெயர் 15 ரன்களும் எடுத்து அடுத்தடுத்து வெளியேறினார்.

த்ரில் வெற்றி

கடைசி வரை நிதானமாக நின்று விளையாடிய ஸ்ரேயாஸ் ஐயர் மும்பை அணிக்கு தலைவலி கொடுத்தார். இதனால் கடைசி 6 பந்துகளில் 4 ரன்கள் தேவைப்பட்டது. அந்த கடைசி ஓவரை க்ருணால் பாண்ட்யாவிடம் கொடுத்தார் ரோகித் சர்மா. பரபரப்பாக செல்லும் என எதிர்பார்க்கப்பட்ட நிலையில் முதல் பந்திலேயே சிக்ஸர் அடித்து முடித்துக்கொடுத்தார் அஸ்வின். 19.1 ஓவர்களில் டெல்லி அணி 6 விக்கெட் இழப்புக்கு 132 ரன்கள் எடுத்து வெற்றி பெற்றது.