IPL 2026: மும்பை இந்தியன்ஸ் vs சன்ரைசர்ஸ் ஹைதராபாத்.. டாஸ் வென்றது யார்? ரோஹித் குறித்து அப்டேட்

மும்பை: 2026 ஐபிஎல் தொடரின் விறுவிறுப்பான 41-வது லீக் போட்டியில் மும்பை இந்தியன்ஸ் மற்றும் சன்ரைசர்ஸ் ஹைதராபாத் அணிகள் இன்று மோதுகின்றன. மும்பை வான்கடே மைதானத்தில் நடைபெறும் இந்த ஆட்டத்தில் டாஸ் வென்ற மும்பை அணி கேப்டன் ஹர்திக் பாண்டியா, முதலில் பேட்டிங் செய்வதாக அதிரடியாக அறிவித்தார். ஆனால், மும்பை ரசிகர்களுக்கு ஒரு பேரிடியாக, நட்சத்திர வீரர் ரோஹித் சர்மா இந்த போட்டியிலும் களமிறங்கவில்லை என்ற தகவல் வெளியானது.

டாஸ் வென்ற பிறகு பேசிய ஹர்திக் பாண்டியா, "இன்று வானிலை மிகவும் குளிர்ச்சியாகவும், காற்றுடனும் காணப்படுகிறது. பனிப்பொழிவு ஒரு பெரிய தாக்கத்தை ஏற்படுத்தாது என்பதால் முதலில் பேட்டிங் செய்ய முடிவு செய்துள்ளோம். கடந்த சில நாட்களாக வீரர்கள் அனைவரும் ஒன்றாகச் சேர்ந்து நேரத்தைச் செலவிட்டோம், இது அணியை புத்துணர்ச்சியாக்க உதவியது" என்றார்.

மேலும் ரோஹித் சர்மா குறித்துப் பேசுகையில், "ரோஹித் இன்னும் முழுமையான உடல் தகுதியை எட்டவில்லை, அவர் பழைய நிலைக்குத் திரும்ப இன்னும் 2 போட்டிகள் வரை ஆகலாம். அதேபோல் குயிண்டன் டி காக் மணிக்கட்டில் ஏற்பட்ட காயம் காரணமாக இந்த போட்டியில் விளையாடவில்லை. அவருக்குப் பதிலாக ரியான் ரிகல்டன் மற்றும் ராபின் மின்ஸ் அணியில் சேர்க்கப்பட்டுள்ளனர்" எனத் தெரிவித்தார்.

மறுபுறம் சன்ரைசர்ஸ் ஹைதராபாத் கேப்டன் பாட் கம்மின்ஸ் பேசுகையில், "முதலில் பந்துவீசுவதில் எங்களுக்கு மகிழ்ச்சியே. ஆடுகளம் சற்று பிசுபிசுப்பாக இருக்கும் எனத் தோன்றுகிறது. வழக்கமாக இது அதிக ரன்கள் குவிக்கும் மைதானம் என்பதால், எங்கள் திட்டத்தை சரியாகச் செயல்படுத்தப் பார்ப்போம். ஷிவாங் குமாருக்குப் பதிலாக ஹர்ஷ் துபே அணியில் இணைந்துள்ளார்" என்றார்.

வான்கடே மைதானத்தைப் பொறுத்தவரை, ஒரு முனையில் புற்கள் அதிகமாகவும், மறுமுனையில் வறண்ட தன்மையுடனும் காணப்படுகிறது. இதனால் பந்துவீச்சாளர்கள் வேரியேஷன் மற்றும் ஸ்லோயர் பந்துகளைப் பயன்படுத்தி விக்கெட் வீழ்த்த வாய்ப்புள்ளது. ஸ்கொயர் பவுண்டரிகள் 61 மீட்டர் மற்றும் 67 மீட்டர் அளவிலும், நேராக இருக்கும் பவுண்டரி 72 மீட்டர் அளவிலும் உள்ளது. ஜஸ்பிரித் பும்ரா மற்றும் ஈஷன் மலிங்கா ஆகியோருக்கு இந்த ஆடுகளம் சாதகமாக இருக்கும் என எதிர்பார்க்கப்படுகிறது.

மும்பை இந்தியன்ஸ் அணி 11 வீரர்கள்: ரியான் ரிகல்டன், வில் ஜாக்ஸ், நமன் திர், சூர்யகுமார் யாதவ், திலக் வர்மா, ஹர்திக் பாண்டியா, ராபின் மின்ஸ், டிரென்ட் போல்ட், ஜஸ்பிரித் பும்ரா, ஏ.எம். கசன்ஃபர், அஷ்வணி குமார்.

மும்பை இந்தியன்ஸ் இம்பாக்ட் வீரர்கள்: மயங்க் ராவத், ரகு ஷர்மா, ஷர்துல் தாக்கூர், கிரிஷ் பகத், ராஜ் பாவா

சன்ரைசர்ஸ் ஹைதராபாத் அணி 11 வீரர்கள்: அபிஷேக் சர்மா, டிராவிஸ் ஹெட், இஷான் கிஷன், ஹென்ரிச் கிளாசன், சலில் அரோரா, நிதிஷ் குமார் ரெட்டி, பாட் கம்மின்ஸ், ஹர்ஷ் துபே, சாகிப் ஹுசைன், பிரபுல் ஹிங்கே, ஈஷன் மலிங்கா.

சன்ரைசர்ஸ் ஹைதராபாத் இம்பாக்ட் வீரர்கள்: ஸ்மரன் ரவிச்சந்திரன், அனிகேத் வர்மா, லியாம் லிவிங்ஸ்டோன், ஷிவாங் குமார், ஹர்ஷல் படேல்