MI vs KKR: எந்த வீரரும் செய்யாத மெகா ஐபிஎல் சாதனை.. ரோஹித் சர்மா செய்த 19 ஆண்டு ரெக்கார்டு

மும்பை: 2026 ஐபிஎல் தொடரின் இரண்டாவது லீக் போட்டியில் கொல்கத்தா நைட் ரைடர்ஸ் - மும்பை இந்தியன்ஸ் அணிகள் மோதின. இந்தப் போட்டியின் மூலம் மும்பை அணியின் நட்சத்திர வீரர் ரோஹித் சர்மா ஒரு மாபெரும் வரலாற்றுச் சாதனையைப் படைத்துள்ளார். ஐபிஎல் வரலாற்றில் 2008 முதல் 2026 வரை நடைபெற்றுள்ள அனைத்து 19 சீசன்களிலும் விளையாடிய முதல் சர்வதேச அனுபவம் கொண்ட வீரர் என்ற பெருமையை ரோஹித் சர்மா பெற்றுள்ளார்.

விராட் கோலிக்கு பிறகு அனைத்து ஐபிஎல் சீசன்களிலும் விளையாடிய இரண்டாவது வீரர் இவராவார். ஆனால், விராட் கோலி தனது முதல் சீசனில் சர்வதேச போட்டிகளில் அறிமுகமாகாத உள்ளூர் வீரராகக் களமிறங்கினார். ரோஹித் சர்மா 2007-லேயே இந்திய அணிக்காக அறிமுகமாகிவிட்டதால், அனைத்து சீசன்களிலும் சர்வதேச தகுதி கொண்ட வீரராகவே விளையாடி இந்தச் சாதனையைப் படைத்துள்ளார்.

இந்தப் போட்டியில் முதலில் பேட்டிங் செய்த கொல்கத்தா அணி, கேப்டன் அஜின்கியா ரஹானே (67) மற்றும் அங்க்ரிஷ் ரகுவன்ஷி (51) ஆகியோரின் அதிரடியால் 20 ஓவர்களில் 4 விக்கெட் இழப்புக்கு 220 ரன்கள் குவித்தது. மும்பை தரப்பில் சிறப்பாகப் பந்துவீசிய ஷர்துல் தாகூர் 3 விக்கெட்டுகளை வீழ்த்தி அசத்தினார்.

221 ரன்கள் என்ற இமாலய இலக்கை நோக்கி விளையாடிய மும்பை அணிக்கு ரோஹித் சர்மா மற்றும் ரையன் ரிகெல்டன் ஜோடி மின்னல் வேகத் தொடக்கம் அளித்தது. ரோஹித் சர்மா 38 பந்துகளில் 6 சிக்ஸர்கள் மற்றும் 6 பவுண்டரிகளுடன் 78 ரன்கள் குவித்து ஆட்டமிழந்தார். ரையன் ரிகெல்டன் 43 பந்துகளில் 81 ரன்கள் விளாசினார். இறுதியில் சூர்யகுமார் யாதவ் (16), திலக் வர்மா (20) மற்றும் கேப்டன் ஹர்திக் பாண்டியா (18) ஆகியோரின் பங்களிப்பால் மும்பை அணி 19.1 ஓவர்களில் 4 விக்கெட் இழப்புக்கு 224 ரன்கள் எடுத்து வெற்றி பெற்றது.

சிஎஸ்கே-வுக்கு அடி மேல் அடி.. தோனி மட்டுமில்ல, 'பேபி ஏபி'யும் அவுட்.. என்ன செய்யப் போகிறது?

ரோஹித் சர்மா இதுவரை ஐபிஎல் தொடரில் 273 போட்டிகளில் விளையாடி 7046 ரன்களைக் குவித்துள்ளார். டெக்கான் சார்ஜர்ஸ் அணிக்காக 2009-ல் கோப்பை வென்ற அவர், மும்பை இந்தியன்ஸ் அணிக்கு கேப்டனாக 5 கோப்பைகளை வென்று கொடுத்துள்ளார். வான்கடே மைதானத்தில் தனது 19-வது சீசனை வெற்றியுடன் தொடங்கியுள்ள ரோஹித் சர்மாவை ரசிகர்கள் சமூக வலைதளங்களில் கொண்டாடி வருகின்றனர். கொல்கத்தா தரப்பில் வைபவ் அரோரா, கார்த்திக் தியாகி மற்றும் சுனில் நரைன் ஆகியோர் தலா 1 விக்கெட் வீழ்த்தினர். மும்பை அணியின் இந்த அதிரடி வெற்றி அந்த அணிக்குத் தொடக்கத்திலேயே நல்ல உத்வேகத்தை அளித்தது.

CSK: சிஎஸ்கே ரசிகர்களுக்குப் பேரிடி.. தோனி 2 வாரம் கழித்து விளையாட வாய்ப்பில்லை.. மேலும் சிக்கல்!