ரஞ்சி கோப்பை 2026: சர்பராஸ் கான் அதிரடி சதம்.. பதோனி இரட்டை சதம்

மும்பை: ரஞ்சி கோப்பை 2026-27 கிரிக்கெட் தொடரில் திங்கள்கிழமை நடைபெற்ற ஆட்டங்களில் பல முன்னணி பேட்ஸ்மேன்கள் அதிரடி சதங்களை விளாசினர். மும்பை அணியின் சர்பராஸ் கான் ஆட்டமிழக்காமல் 139 ரன்களும், டெல்லி அணியின் ஆயுஷ் பதோனி 217 ரன்களும் குவித்து அசத்தினர். மற்றொரு போட்டியில் சண்டிகர் அணியை வீழ்த்திய ஹரியானா அணி இரண்டே நாட்களில் இன்னிங்ஸ் வெற்றி பெற்று சாதனை படைத்தது.

பாலம் 'பி' மைதானத்தில் நடைபெற்ற குரூப் 'சி' போட்டியில், குஜராத் அணிக்கு எதிராக டெல்லி அணி தனது முதல் இன்னிங்ஸில் 6 விக்கெட் இழப்பிற்கு 648 ரன்கள் குவித்து டிக்ளேர் செய்தது. டெல்லி அணியின் கேப்டன் ஆயுஷ் பதோனி 246 பந்துகளில் 22 பவுண்டரிகள், 2 சிக்ஸர்களுடன் 217 ரன்கள் குவித்தார். அவருடன் இணைந்து அதிரடி காட்டிய பிரியான்ஷ் ஆர்யா 221 பந்துகளில் 199 ரன்கள் எடுத்து ஒரு ரன்னில் இரட்டை சதத்தை தவறவிட்டார்.

சுமித் மாத்தூர் 92 ரன்களும், அனுஜ் ராவத் ஆட்டமிழக்காமல் 61 ரன்களும் எடுத்தனர். இரண்டாம் நாள் ஆட்டநேர முடிவில் குஜராத் அணி தனது முதல் இன்னிங்ஸில் 2 விக்கெட் இழப்பிற்கு 98 ரன்கள் எடுத்து, 550 ரன்கள் பின்தங்கியுள்ளது.

பிசிசிஐ தேர்வுக்குழுத் தலைவர் பிரக்யான் ஓஜா முன் காத்திருக்கும் சவால்கள் என்ன?

குரூப் 'டி' போட்டியில் இமாச்சல பிரதேச அணியை 140 ரன்களுக்கு சுருட்டிய மும்பை அணி, தனது முதல் இன்னிங்ஸில் இரண்டாம் நாள் முடிவில் 4 விக்கெட் இழப்பிற்கு 398 ரன்கள் எடுத்து 258 ரன்கள் முன்னிலை பெற்றுள்ளது. மும்பை அணியின் சர்பராஸ் கான் 213 பந்துகளில் 18 பவுண்டரிகளுடன் 139 ரன்கள் எடுத்து ஆட்டமிழக்காமல் உள்ளார்.

ஆகாஷ் ஆனந்த் 58 ரன்களுடன் களத்தில் உள்ளார். இவர்கள் இருவரும் 5-வது விக்கெட்டுக்கு பிரியாத 176 ரன்கள் சேர்த்துள்ளனர். முன்னதாக சித்தேஷ் லாட் 87 ரன்களும், முஷீர் கான் 57 ரன்களும் எடுத்தனர். இமாச்சல பிரதேச அணியை குறைந்த ரன்களுக்கு சுருட்ட துஷார் தேஷ்பாண்டே 4 விக்கெட்டுகளை வீழ்த்தியிருந்தார்.

ரோத்தக்கில் நடைபெற்ற போட்டியில், சண்டிகர் அணியை இன்னிங்ஸ் மற்றும் 24 ரன்கள் வித்தியாசத்தில் ஹரியானா அணி அபார வெற்றி பெற்றது. ஹரியானா அணி தனது முதல் இன்னிங்ஸில் 245 ரன்கள் எடுத்தது. அதில் நிஷாந்த் சிந்து 92 ரன்களும், யஷ்வர்தன் தலால் 95 ரன்களும் எடுத்தனர். முதல் இன்னிங்ஸில் 103 ரன்களுக்கு ஆட்டமிழந்த சண்டிகர் அணி, இரண்டாவது இன்னிங்ஸிலும் ஹரியானாவின் பந்துவீச்சை சமாளிக்க முடியாமல் 118 ரன்களுக்கு சுருண்டது.

ஹரியானாவின் நிஷாந்த் சிந்து 2-வது இன்னிங்ஸில் 27 ரன்கள் விட்டுக்கொடுத்து 6 விக்கெட்டுகளைக் கைப்பற்றி அணியின் வெற்றிக்கு முக்கியக் காரணமாக அமைந்தார். உத்தரப் பிரதேசம் - கோவா இடையிலான போட்டியில், கோவா தனது முதல் இன்னிங்ஸில் 164 ரன்களுக்கு ஆட்டமிழந்தது. சுழற்பந்து வீச்சாளர் ஜீஷான் அன்சாரி 5 விக்கெட்டுகளை வீழ்த்தினார். உத்தரப் பிரதேசம் 140 ரன்கள் ஒட்டுமொத்த முன்னிலையுடன் 2-வது இன்னிங்ஸில் 102/4 ரன்கள் எடுத்துள்ளது. கேப்டன் ஆர்யன் ஜூயல் 60 ரன்களுடன் களத்தில் உள்ளார்.

கர்நாடகா அணி சௌராஷ்டிராவிற்கு எதிராக தனது முதல் இன்னிங்ஸில் 342 ரன்கள் எடுத்தது. மன்வந்த் குமார் தனது முதல் முதல்தர சதமாக 135 ரன்கள் விளாசினார். சௌராஷ்டிரா அணி இரண்டாம் நாள் முடிவில் 164/4 ரன்கள் எடுத்துள்ளது.

மத்தியப் பிரதேச அணி புதுச்சேரியை 177 ரன்களுக்கு சுருட்டி, தனது முதல் இன்னிங்ஸில் 302/5 ரன்கள் எடுத்து 125 ரன்கள் முன்னிலை பெற்றுள்ளது. கேப்டன் ரஜத் படிதார் ஆட்டமிழக்காமல் 107 ரன்கள் எடுத்தார். கேரளா அணி ஒடிசாவுக்கு எதிராக முதல் இன்னிங்ஸில் 404 ரன்கள் குவித்தது. ஒடிசா அணி 114/3 ரன்கள் எடுத்துள்ளது. பரோடா அணி பீஹாருக்கு எதிராக 416 ரன்கள் குவித்தது. பீஹார் அணி முதல் இன்னிங்ஸில் 166 ரன்களுக்கு ஆட்டமிழந்து, 2-வது இன்னிங்ஸில் 4/0 ரன்கள் எடுத்துள்ளது.

சென்னையில் உத்தராகண்ட் அணிக்கு எதிரான போட்டியில் தமிழ்நாடு அணி முதல் இன்னிங்ஸில் 313 ரன்கள் எடுத்தது. பிரதோஷ் ரஞ்சன் பால் 136 ரன்களும், பாபா இந்திரஜித் 77 ரன்களும் எடுத்தனர். உத்தராகண்ட் அணி 2-வது இன்னிங்ஸில் 9/1 ரன்கள் எடுத்துள்ளது. ராஜஸ்தான் அணி ரயில்வேஸுக்கு எதிராக சச்சின் யாதவ் 194 ரன்கள் மற்றும் கரண் லம்பா 194 ரன்கள் எடுத்தனர். இருவரின் அதிரடியால் 497 ரன்கள் குவித்தது.

Also Read

IND vs NZ: பும்ராவுக்கு வாழ்நாளில் முக்கிய அறிவுரை வழங்கிய ரவி சாஸ்திரி

பெங்கால் - சர்வீசஸ் போட்டியில் 209 ரன்கள் இலக்கை நோக்கி ஆடும் சர்வீசஸ் அணி 2-வது இன்னிங்ஸில் 12/0 ரன்கள் எடுத்துள்ளது. விதர்பா அணி ஜம்மு காஷ்மீரின் 260 ரன்களுக்கு பதிலாக 253/7 ரன்கள் எடுத்துள்ளது.