கிரிக்கெட் தரவரிசை-மீண்டும் 'டாப்-10'ல் சச்சின்

டெல்லி: ஒரு நாள் வீரர்களுக்கான ஐசிசி தரவரிசையில் மாஸ்டர் பேட்ஸ்மேன் சச்சின் மீண்டும் டாப்-10 பட்டியலில் இடம்பிடித்துள்ளார்.

இலங்கை முத்தரப்பு தொடரின் பைனலில் சதம் அடித்து அணிக்கு வெற்றி கோப்பை பெற்று தந்ததை அடுத்து அவர் இந்த முன்னேற்றம் கண்டுள்ளார்.

அவர் 737 புள்ளிகள் பெற்று 5 இடங்கள் முன்னேறி தற்போது 7வது இடத்துக்கு வந்துள்ளார். சுமார் 10 மாதங்களுக்கு பின்னர் அவர் மீண்டும் டாப்-10 பட்டியலுக்குள் வருவது குறிப்பிடத்தக்கது.

ஒரு நாள் பேட்ஸ்மேன்களுக்கான தரவரிசையில் முதல் இரண்டு இடங்களிலும் இந்தியர்களே இடம்பிடித்துள்ளனர். 825 புள்ளிகளுடன் முதலிடத்தை கேப்டன் டோணியும், 778 புள்ளிகளுடன் இரண்டாவது இடத்தை யுவராஜூம் கைப்பற்றியுள்ளனர்.

காயம் காரணமாக இத்தொடரில் பங்கேற்காத ஷேவாக், கம்பீர் தலா 2 இடங்கள் பின்தங்கியுள்ளனர். தற்போது ஷேவாக் 9வது, கம்பீர் 19வது இடத்தில் இருக்கின்றனர்.

இந்தியா 2வது இடம்...

அணிகளுக்கான தரவரிசையில் இந்தியா 125 புள்ளிகளுடன் ஒரு இடம் முன்னேறி இரண்டாவது இடத்துக்கு வந்துள்ளது. முதலிடத்தில் தென் ஆப்ரிக்காவும், மூன்றாவது இடத்தில் ஆஸ்திரேலியாவும் உள்ளன.