IND vs USA முதல் உலகக்கோப்பை போட்டியில் அனுபவ வீரரை கழற்றிவிட முடிவு.. இந்திய அணியில் முக்கிய முடிவு

மும்பை: 2026 டி20 உலகக்கோப்பைத் தொடரின் முதல் போட்டியில் அமெரிக்காவை எதிர்கொள்ளும் இந்திய அணியில், மூத்த வீரர் ஒருவருக்கு பிளேயிங் லெவனில் இடம் கிடைக்காது என்பது ஏறக்குறைய உறுதியாகியுள்ளது. அவருக்குப் பதிலாக இஷான் கிஷன் அணியில் சேர்க்கப்படவுள்ளார். வரும் பிப்ரவரி 7ஆம் தேதி மும்பை வான்கடே மைதானத்தில் நடைபெறும் இந்த ஆட்டத்திற்கான அணியைத் தேர்வு செய்வதில் நிர்வாகம் ஒரு தெளிவான முடிவுக்கு வந்துள்ளதாகத் தெரிகிறது.

பயிற்சி ஆட்டம் கொடுத்த பதில்

நேற்று நவி மும்பையில் நடைபெற்ற தென்னாப்பிரிக்காவுக்கு எதிரான பயிற்சி ஆட்டத்தில் அனுபவ வீரரான சஞ்சு சாம்சன் பேட்டிங் செய்யவும் இல்லை, விக்கெட் கீப்பிங் செய்யவும் இல்லை. ஆனால், இஷான் கிஷன் தொடக்க வீரராகக் களமிறங்கி வெறும் 20 பந்துகளில் 53 ரன்கள் குவித்து அதிரடி ஆட்டம் ஆடினார். இதில் 7 சிக்ஸர்களும் 2 பவுண்டரிகளும் அடங்கும்.

அதுமட்டுமின்றி, தென்னாப்பிரிக்கா பேட்டிங் செய்தபோது இஷான் கிஷன் தான் விக்கெட் கீப்பிங் பணியையும் கவனித்தார். இதன் மூலம், அமெரிக்காவுக்கு எதிரான முதல் போட்டியில் சஞ்சு சாம்சனைத் தவிர்த்துவிட்டு, இஷான் கிஷனைத் தொடக்க வீரராகவும் விக்கெட் கீப்பராகவும் களமிறக்க அணி நிர்வாகம் முடிவு செய்துள்ளது தெளிவாகத் தெரிகிறது.

வாய்ப்பை வீணடித்த சஞ்சு

கடந்த மாதம் நடைபெற்ற நியூசிலாந்துக்கு எதிரான 5 போட்டிகள் கொண்ட டி20 தொடரில் சஞ்சு சாம்சனுக்குத் தொடர்ந்து வாய்ப்பு வழங்கப்பட்டது. ஆனால் அந்த வாய்ப்புகளை அவர் சரியாகப் பயன்படுத்திக்கொள்ளவில்லை. அந்த 5 போட்டிகளில் அவர் முறையே 10, 6, 0, 24 மற்றும் 6 ரன்கள் மட்டுமே எடுத்தார்.

மறுபுறம், இரண்டு ஆண்டுகளுக்குப் பிறகு அணிக்குத் திரும்பிய இஷான் கிஷன், நியூசிலாந்துக்கு எதிரான ஒரு போட்டியில் 42 பந்துகளில் சதம் விளாசினார். மற்றொரு போட்டியில் 32 பந்துகளில் 76 ரன்கள் குவித்தார். தற்போது பயிற்சி ஆட்டத்திலும் அரைசதம் அடித்துத் தனது ஃபார்மை நிரூபித்துள்ளார்.

பும்ரா மற்றும் பந்துவீச்சாளர்கள் நிலை

பயிற்சி ஆட்டத்தில் ஜஸ்பிரித் பும்ரா பங்கேற்கவில்லை என்றாலும், அவர் அணியின் முக்கிய வேகப்பந்து வீச்சாளர் என்பதால் ஆடும் லெவனில் நிச்சயம் இடம்பெறுவார். கடந்த உலகக்கோப்பையில் தொடர் நாயகன் விருது வென்ற அவர், இம்முறையும் பந்துவீச்சுப் படையை வழிநடத்துவார்.

அதேசமயம், பயிற்சி ஆட்டத்தில் அதிக ரன்களை விட்டுக்கொடுத்த ஹர்ஷித் ரானா மற்றும் விக்கெட் வீழ்த்தாத குல்தீப் யாதவ் ஆகியோருக்கு முதல் போட்டியில் வாய்ப்பு கிடைப்பது சந்தேகமே. பேட்டிங் மற்றும் பந்துவீச்சு என இரண்டிலும் கலக்கிய திலக் வர்மா அணியில் முக்கிய இடம்பிடிப்பார்.

அமெரிக்காவுக்கு எதிரான உத்தேச இந்திய அணி:

அபிஷேக் சர்மா, இஷான் கிஷன், திலக் வர்மா, சூர்யகுமார் யாதவ், அக்சர் படேல், ஹர்திக் பாண்டியா, ரிங்கு சிங், சிவம் துபே, அர்ஷ்தீப் சிங், ஜஸ்பிரித் பும்ரா, வருண் சக்கரவர்த்தி.