இந்திய அணிக்கு விழுந்த அடி.. உலகக்கோப்பையில் இருந்து பந்துவீச்சாளர் நீக்கம்.. சிராஜ்-க்கு வாய்ப்பு?

மும்பை: 2026 டி20 உலகக்கோப்பைத் தொடர் தொடங்குவதற்கு ஒருநாள் மட்டுமே இருக்கும் நிலையில் இந்திய அணிக்குப் பெரும் பின்னடைவு ஏற்பட்டு இருக்கிறது. இந்திய அணியின் இளம் வேகப்பந்து வீச்சாளர் ஹர்ஷித் ரானா, முழங்கால் காயம் காரணமாகத் தொடரிலிருந்து விலகியுள்ளதாகத் தகவல்கள் வெளியாகியுள்ளன. அவர் பேட்டிங்கிலும் கைகொடுப்பார் எனும் நிலையில் இது பெரும் பின்னடைவாக மாறி உள்ளது.

தென்னாப்பிரிக்காவுக்கு எதிராக நடைபெற்ற பயிற்சி ஆட்டத்தின் போது ஹர்ஷித் ரானாவுக்குக் காயம் ஏற்பட்டது. ஒரே ஒரு ஓவர் மட்டுமே வீசிய நிலையில், முழங்கால் வலி காரணமாக அவர் பாதியிலேயே மைதானத்தை விட்டு வெளியேறினார். தற்போது காயம் தீவிரமாக இருப்பதால், அவர் உலகக்கோப்பைத் தொடரில் பங்கேற்க மாட்டார் எனக் கூறப்படுகிறது.

கேப்டன் சூசகம்

இது குறித்து செய்தியாளர்களிடம் பேசிய இந்திய அணியின் கேப்டன் சூர்யகுமார் யாதவ், ஹர்ஷித் ரானா விலகுவதை உறுதிப்படுத்தும் விதமாகப் பதிலளித்துள்ளார். "ஹர்ஷித் ரானா அணியில் இல்லாவிட்டால், அது நிச்சயம் எங்களுக்குப் பெரும் பின்னடைவுதான். இருப்பினும், அவருக்குப் பதிலாக மாற்று வீரரைத் தேர்வு செய்ய எங்களிடம் சில வீரர்கள் தயாராக உள்ளனர்" என்று அவர் தெரிவித்துள்ளார்.

ஹர்ஷித் ரானா பந்துவீச்சு மட்டுமின்றி, கடைசி கட்டத்தில் அதிரடியாக பேட்டிங் செய்யும் திறமை கொண்டவர். அவரை ஒரு சிறந்த வேகப்பந்து வீச்சு ஆல்-ரவுண்டராக இந்திய அணி தயார் செய்து வந்தது. சரியான நேரத்தில் அவர் காயமடைந்தது அணி நிர்வாகத்திற்குக் கவலையை அளித்துள்ளது.

மாற்று வீரர் யார்?

ஹர்ஷித் ரானாவுக்குப் பதிலாக முகமது சிராஜ் அணியில் சேர்க்கப்பட அதிக வாய்ப்புள்ளது. இந்திய அணியில் ஏற்கனவே ஹர்திக் பாண்டியா, சிவம் துபே, அக்சர் படேல் போன்ற ஆல்-ரவுண்டர்கள் உள்ளனர். எனவே, ஒரு முழுநேர வேகப்பந்து வீச்சாளரைச் சேர்க்கவே அணி நிர்வாகம் விரும்பும்.

வெள்ளை பந்து கிரிக்கெட்டில் முகமது சிராஜ் சிறப்பான சாதனைகளை வைத்துள்ளார். மேலும், உலகக்கோப்பை போன்ற பெரிய தொடர்களில் விளையாடிய அனுபவம் அவருக்கு உள்ளது. எனவே, ஹர்ஷித் ரானாவுக்குப் பதிலாக சிராஜ் அணியில் இணைவார் என எதிர்பார்க்கப்படுகிறது. இது குறித்த அதிகாரப்பூர்வ அறிவிப்பை இந்திய கிரிக்கெட் வாரியம் விரைவில் வெளியிடும்.