அயர்லாந்துக்கு லந்தைக் கொடுத்த ஓமன்... 2 விக்கெட் வித்தியாசத்தில் வென்று அசத்தல்!

கடினமான இலக்கை நோக்கி

முதலில் பேட் செய்த அயர்லாந்து அணி 154 ரன்களை எடுத்திருந்தது. ஓமன் புதுமுக அணி என்பதாலும், அயர்லாந்து அனுபவம் வாய்ந்த அணி என்பதாலும் நிச்சயம் அந்த அணியே வெல்லும என்ற எதிர்பார்ப்பு இருந்தது.

அழகான பேட்டிங்

ஆனால் ஓமன் அணி அசத்தி விட்டது. அந்த அணியின் தொடக்க ஆட்டக்காரர்களான ஜீசன் மக்சூத் 33 பந்துகளில் 38 ரன்களை விளாசினார். கவார் அலி 26 பந்துகளில் 34 ரன்களைக் குவித்தார். 9 ஓவர்களில் அந்த அணி 69 ரன்களைக் குவித்து விட்டது.

டிவிஸ்ட் கொடுத்த கெவின் ஓ பிரையன்

இந்த நிலையில் கெவின் ஓ பிரையன் இந்த ஜோடியை அடுத்தடுத்து காலி செய்தார். இதனால் ஆட்டம் மீண்டும் அயர்லாந்து பக்கம் வந்தது. ஒரு முனையில் ஓமன் வீரர் ஜதீந்தர் சிங் 26 பந்துகளில் 24 ரன்களைக் குவித்தார்.

அட்டகாசமாக ஆடிய ஆமீர் அலி

ஆனால் கடைசிக் கட்டத்தில் ஓமன் வீரர் ஆமிர் அலி அசத்தி விட்டார். அதிரடியாக ஆடிய அவர் 16 பந்துகளில் 32 ரன்களைக் குவித்தார். இதில் 5 பவுண்டரிகள், ஒரு சிக்ஸர் அடக்கம். கடைசி ஓவரில் ஓமன், அயர்லாந்தை அயர வைத்து விட்டது.

14 ரன்கள் தேவை

கடைசி ஓவரில் ஓமனுக்கு 14 ரன்கள் தேவைப்பட்டது. அந்த ஓவரைப் போட்டவர் மேக்ஸ் சோரன்சன். சொதப்பலாக இவர் பந்து வீசியதும், அயர்லாந்து வீரர்கள் மோசமாக பீல்டிங் செய்ததாலும், ஓமனுக்கு அதிர்ஷ்டம் இருந்ததாலும் அந்த ஓவரை மிகத் திறமையாக சமாளித்து வெற்றியைப் பெற்றது ஓமன்.