"பும்ரா.. எனக்கு பந்துவீசாதே".. 16 வயது சிறுவனை பார்த்து மிரண்ட யுவராஜ் சிங்.. என்ன நடந்தது?

மும்பை: இந்திய அணியின் முன்னாள் நட்சத்திர வீரர் யுவராஜ் சிங், உலகின் தலைசிறந்த வேகப்பந்து வீச்சாளரான ஜஸ்ப்ரீத் பும்ரா குறித்து ஒரு சுவாரஸ்யமான தகவலைப் பகிர்ந்துள்ளார். 16 வயதாக இருந்த போதே பும்ரா தனது பந்துவீச்சால் யுவராஜை மிரள வைத்துள்ளார். மைக்கேல் வாகனுடனான நேர்காணலில் யுவராஜ் சிங் பழைய நினைவுகளைப் பகிர்ந்து கொண்டார். அவர் கூறியதாவது:

"புற்றுநோய் பாதிப்பில் இருந்து மீண்டு வந்து, நான் மீண்டும் கிரிக்கெட் மைதானத்திற்குத் திரும்ப முயற்சி செய்து கொண்டிருந்த காலம் அது. அப்போது வலைப்பயிற்சியில் 16 வயது சிறுவனாக பும்ரா பந்துவீசினார். அவரது பந்துவீச்சு மிக மிரட்டலாகவும், அதிவேகமாகவும் இருந்தது. அந்த சிறுவனின் வேகத்தைப் பார்த்து நான் ஒரு நிமிடம் மிரண்டு போனேன்.

உடனே நான் அங்கிருந்தவர்களிடம், "இந்த சிறுவனை வலைப்பயிற்சியில் இருந்து வெளியேற்றுங்கள், தயவுசெய்து எனக்கு பந்துவீசச் சொல்லாதீர்கள்" எனக் கூறினேன். "தம்பி.. நீ யாராக இருந்தாலும் சரி, பந்துவீசுவதை நிறுத்து" என்று அவரிடமே நேரடியாகச் சொன்னேன். அப்போது அவரிடம் பெரிய அளவில் நுணுக்கங்கள் தெரியவில்லை என்றாலும், வேகம் அபாரமாக இருந்தது. அவரது வித்தியாசமான பந்துவீச்சு முறை, பந்தை பேட்டர்களின் விலா எலும்பு நோக்கி எகிற வைத்தது. அப்போதே அவரிடம் ஏதோ ஒரு தனித்திறமை இருப்பதை உணர்ந்தேன்.

இன்று பும்ரா உலகின் நம்பர் 1 பந்துவீச்சாளராக உயர்ந்துள்ளார். இந்திய அணியின் பல வெற்றிகளுக்கு அவர் முக்கிய காரணமாகத் திகழ்கிறார். குறிப்பாக சமீபத்தில் நடந்த டி20 உலகக்கோப்பை தொடரில் இந்தியாவின் வெற்றிக்கு அவர் ஆற்றிய பங்கு அளப்பரியது. தற்போது பேட்டர்கள் பும்ராவின் பந்துவீச்சை எதிர்கொள்ளவே பயப்படுகிறார்கள். அவரை அதிரடியாக ஆட முயற்சிக்காமல், சிங்கிள் ரன் எடுத்து ஸ்ட்ரைக்கை மாற்றி தப்பிக்கவே நினைக்கிறார்கள். யாராவது அவரை அடிக்க முயற்சி செய்தால், அவர்களைத் தனது புத்திசாலித்தனமான பந்துவீச்சால் அவுட் ஆக்கி விடுகிறார். அவர் மிகவும் புத்திசாலி மற்றும் திறமையானவர். அவரது ஸ்லோயர் பந்துகளைக் கணிப்பது மிகவும் கடினம்" என யுவராஜ் புகழாரம் சூட்டினார்.

32 வயதான பும்ரா தற்போது ஐபிஎல் 2026 தொடரில் மும்பை இந்தியன்ஸ் அணிக்காக விளையாடி வருகிறார் என்பது குறிப்பிடத்தக்கது. 2011 உலகக்கோப்பையின் நாயகன் யுவராஜ் சிங், பும்ராவைப் பாராட்டியுள்ளது ரசிகர்களிடையே கவனம் பெற்றுள்ளது.