நம்ம இஷாந்த் சர்மாவா? எப்படிப்பா? சாதனைப் பட்டியலில் கபில் தேவோடு சேர்ந்த இஷாந்த்

சீரற்ற பந்துவீச்சு

இஷாந்த் சர்மா இந்திய அணியில் 19 வயதில் இருந்து ஆடி வருகிறார். எனினும், பல ஆண்டுகளாக அவரால் ஒரே சீராக பந்து வீச முடியாமல் இருந்தது. ஒரு போட்டியில் நன்றாக வீசுவதும், அடுத்த போட்டியில் தன் பந்துவீச்சு அளவுகளை தவறவிடுவதுமாக இருந்தார். இந்திய அணியிலும் இடம் உறுதியாக இல்லாத நிலையும் இருந்தது. எனினும், இஷாந்தின் உயரம் மற்றும் இந்திய அணியின் வேகப் பந்துவீச்சாளர் பற்றாக்குறை காரணமாக அணியில் இடம் பிடித்து வந்தார்.

வித்தையை பிடித்தார்

தற்போது இங்கிலாந்து தொடரில் தனக்கு கைவராத வித்தையை எப்படியோ பிடித்துவிட்டார். கவுன்டி போட்டிகளில் அவர் ஆடியதும் ஒரு காரணம். அதன் விளைவாக இந்த தொடரில் மட்டும், 18 விக்கெட்கள் அள்ளியுள்ளார். இங்கிலாந்து அணியின் ஆண்டர்சன் 21 விக்கெட்கள் எடுத்து இவருக்கு முன்னே இருக்கிறார். ஐந்தாம் போட்டியில் இதுவரை 3 விக்கெட்கள் எடுத்துள்ளார் இஷாந்த். இரண்டாம் இன்னிங்க்ஸ் ஆட்டம் இன்னும் இருக்கிறது.

கபில் தேவ் சாதனை

தற்போது இந்திய பந்துவீச்சாளர் ஒருவர் இங்கிலாந்து மண்ணில் எடுத்த அதிக விக்கெட்கள் பட்டியலில் கபில் தேவோடு முதல் இடத்தில் இருக்கிறார். கபில் தேவ் 13 டெஸ்ட்களில், 22 இன்னிங்க்ஸ்களில் 43 விக்கெட்கள் எடுத்து இருக்கிறார். இஷாந்த் 12 டெஸ்ட்களில், 18 இன்னிங்க்ஸ்களில் 43 விக்கெட்கள் எடுத்து இருக்கிறார். இவர்களுக்கு அடுத்த இடத்தில் அனில் கும்ப்ளே 36 விக்கெட்களோடு இருக்கிறார்.

ஒரே சீரிஸில்..

அடுத்து ஒரே இங்கிலாந்து தொடரில் அதிக விக்கெட்கள் எடுத்த இந்தியர்கள் பட்டியலில் புவனேஸ்வர் குமார் மற்றும் ஜாகிர் கானுக்கு பின்னே இருக்கிறார். புவி 19 விக்கெட்களும், ஜாகிர் 18 விக்கெட்களும் எடுத்துள்ளனர். இஷாந்த் 18 விக்கெட்கள் எடுத்துள்ள நிலையில், இன்னும் இரண்டு விக்கெட்கள் எடுத்து விட்டால் அவர்களை முந்தி விடுவார். அதோடு கபில் தேவ் சாதனையையும் முறியடிப்பார்.