பிரேசில் அணி அட்டாக்
இன்று இரவு 8.30 மணிக்கு நடக்க உள்ள போட்டியில் வலிமையான பிரேசில் அணியை எதிர்த்து கடந்த முறை உலகக்கோப்பை இறுதிப்போட்டிக்கு முன்னேறிய குரோஷியா மோத உள்ளது. காயத்தில் இருந்து மீண்டு வந்த நெய்மர், அட்டாக்கில் பாயும் வினிசியஸ், பைக் சைக்கிள் கிக்கில் அசத்திய ரிச்சர்லிசன் என வலிமையான அட்டாக்கோடு பிரேசில் அணி களமிறங்க உள்ளது.
மோட்ரிச் கடைசி போட்டி?
அதேபோல் குரோஷியா அணியை பொறுத்தவரை கேப்டன் லூகா மோட்ரிச்சின் கடைசி உலகக்கோப்பைத் தொடராகும். 37 வயதானாலும் மோட்ரிச் ஓட்டமே குரோஷியாவை காலிறுதி வரை கொண்டு வந்துள்ளது. ஆனால் நாக் அவுட் சுற்றில் ஜப்பான் அணியிடமே பெனால்டி ஷூட் அவுட் வாய்ப்பில் தப்பித்து பிழைத்து குரோஷியா வெற்றிபெற்றதால், பிரேசில் அணிக்கு எதிரான ஆட்டத்தில் சவாலளிக்குமா என்ற எதிர்பார்ப்பு ஏற்பட்டுள்ளது.
அர்ஜென்டினா vs நெதர்லாந்து
தொடர்ந்து நள்ளிரவு 12.30 மணிக்கு தொடக்க உள்ள போட்டியில் நெதர்லாந்து அணியை எதிர்த்து வலிமையான அர்ஜென்டினா அணி விளையாட உள்ளது. நெதர்லாந்து அணி நாக் அவுட் போட்டியில் சுமாராக விளையாடும் அமெரிக்காவை 3-1 என்ற கோல் கணக்கில் வீழ்த்தி காலிறுதிக்கு வந்துள்ளது. நெதர்லாந்து அணியின் அட்டாக் முழுக்க டிபாய், டம்பிரிஸை நம்பியே இருக்கிறது. அதேபோல் தடுப்பாட்டத்தில் எந்த அணிக்கும் சவால் அளிக்கும் என்பதால், அர்ஜென்டினா வீரர்களால் அவ்வளவு எளிதாக கோல் அடிக்க முடியாது.
மெஸ்ஸியின் கடைசி உலகக்கோப்பை
அதேபோல் அர்ஜென்டினா அணியின் அட்டாக் வலிமை அனைவருக்கும் தெரிந்தது என்றாலும், இதுவரை அர்ஜென்டினா அணியின் தடுப்பாட்டத்தின் பலம் முழுமையாக யாருக்கும் தெரியவில்லை. ஏனென்றால் ஒவ்வொரு ஆட்டத்திலும் முதல் பாதியிலேயே முதல் கோலை அடித்து எதிரணிக்கு கோல் அடிக்க வேண்டிய கட்டாயத்தை அர்ஜென்டினா அணி உருவாக்கி வருகிறது. அதுமட்டுமல்லாமல் மெஸ்ஸியின் கடைசி உலகக்கோப்பைத் தொடர் என்பதால், இந்தப் போட்டி மீது ரசிகர்களிடையே பெரிய எதிர்பார்ப்பு ஏற்பட்டுள்ளது.