ஸ்பெயின் வெற்றி
நேற்று முன்னாள் சாம்பியனான ஸ்பெயின் - கோஸ்ட்டா ரிக்கா அணிகளுக்கு இடையிலான ஆட்டம் நடைபெற்றது. இதில் ஸ்பெயின் அணி தொடக்கம் முதலே ஆதிக்கம் செலுத்தியது. இறுதியாக ஸ்பெயின் அணி 7-0 என்ற கோல் கணக்கில் அபார வெற்றியை பதிவு செய்தது. இதில் ஸ்பெயின் அணியின் பல்வேறு வீரர்கள் கோல் அடித்து அசத்தினார்.
காவி சாதனை
குறிப்பாக 18 வயதே நிரம்பிய ஸ்பெயின் அணியின் இளம் வீரர் காவி 5வது கோலை அடித்து அசத்தினார். இதன் மூலம் பிரேசில் ஜாம்பவான் பீலேவுக்கு பின் மிக இளைய வயதில் கோல் அடித்த வீரர் என்ற சாதனையை படைத்துள்ளார். அதேபோல் ஸ்பெயின் அணிக்காக மிக இளைய வயதில் கோல் அடித்தவர் என்ற சாதனையை படைத்துள்ளார்.
பீலேவின் ராஜ்ஜியம்
பிரேசில் ஜாம்பவான் பீலே, 1958 உலகக்கோப்பையில் ஆடிய போது 17 வயதில் கோல் அடித்ததே இதுவரை சாதனையாக உள்ளது. இந்த நிலையில் கோஸ்ட்டா ரிக்கா அணிக்கு எதிராக கோல் அடித்தது பற்றி ஸ்பெயின் அணியின் காவி கூறுகையில், ஜாம்பவான் பீலே-வுக்கு பின் மிக இளவயதில் கோல் அடித்த வீரர் என்பது மிகப்பெரிய கவுரவம்.
காவி கருத்து
ஸ்பெயின் அணிக்காக களமிறங்கி கோல் அடித்தது மகிழ்ச்சியாக உள்ளது. இந்தப் போட்டியில் வெற்றிபெற்றது மகிழ்ச்சியை கொடுக்கிறது. சிறந்த ஆட்டமாக அமைந்தது. ஆனால் எங்கள் பணி இன்னும் முடியவில்லை என்று தெரிவித்தார். இதுமட்டுமல்லாமல் உலகக்கோப்பை கால்பந்து வரலாற்றில் ஸ்பெயின் அணி 100 கோல்கள் அடித்து சாதனை படைத்துள்ளது குறிப்பிடத்தக்கது.