10 ஓவரில் 19 ரன்கள்.. கடைசி போட்டியில் பிஞ்ச்க்கு சோகம்.. கடைசியில் ஸ்மித் கொடுத்த டிவிஸ்ட்

பிஞ்ச் கடைசி போட்டி

ஆஸ்திரேலிய அணி கேப்டன் ஆரோன் பிஞ்சை பொறுத்தவரை, அவர் கடைசியாக விளையாடிய 13 இன்னிங்சில் 5 முறை டக் அவுட் ஆனார். இதனையடுத்து, ஆரோன் பிஞ்ச், நியூசிலாந்துக்கு எதிரான கடைசி ஆட்டத்துடன் ஒருநாள் கிரிக்கெட்டிலிருந்து ஓய்வு பெறுவதாக அறிவித்தார். இன்றைய ஆட்டத்தில் டாஸ் வென்ற நியூசிலாந்து அணி பந்துவீச்சை தேர்வு செய்தது. இதனையடுத்து ஆரோன் பிஞ்ச், ஜாஸ் இங்லிஸ் களத்துக்கு வந்தனர்.

தடுமாறிய ஆஸ்திரேலியா

ஜாஸ் இங்லிஸ் 10 ரன்களில் ஆட்டமிழக்க, கடைசி ஆட்டத்தில் களமிறங்கிய கேப்டன் பிஞ்ச் 5 ரன்களில் வெளியேறினார். நியூசிலாந்து வீரர் பவுல்ட் தன்னுடைய முதல் ஸ்பெல்லில் 6 ஓவர் வீசி 3 மைடண்களுடன் வெறும் 7 ரன்களை மட்டுமே விட்டு கொடுத்து ஒரு விக்கெட்டை கைப்பற்றினார். ஆஸ்திரேலிய அணி 10 ஓவர் முடிவில் 19 ரன்களை மட்டுமே அடித்து 2 விக்கெட்டுகளை வீழ்த்தியது.

ஸ்மித் சதம்

இதனையடுத்து, ஸ்மித் களத்துக்கு வந்த பொறுமையாக விளையாடி அணியை சரிவிலிருந்து மீட்டார். 127 பந்துகளில் தன்னுடைய 12 வது சதத்தை ஸ்மித் பூர்த்தி செய்தார். லாபஸ்சேங் 52 ரன்களும், அலக்ஸ் கேரி 42 ரன்களும் எடுக்க, ஆஸ்திரேலிய அணி கடைசி 20 ஓவரில் 161 ரன்களை சேர்க்க,ஆஸ்திரேலிய அணி 50 ஓவர் முடிவில் 267 ரன்கள் எடுத்தது. 268 ரன்கள் எடுத்தால் வெற்றி என்ற இலக்குடன் களமிறங்கிய நியூசிலாந்து முதல் விக்கெட்டுக்கு 49 ரன்கள் சேர்த்தது.

தொடரும் தோல்வி

ஃபின் ஆலன் 35 ரன்களும், கான்வே 21 ரன்களும், பெரிதும் எதிர்பார்க்கப்பட்ட வில்லியம்சன் 27 ரன்களும் , டாம் லாத்தம் 10 ரன்களும், மிட்செல் 16 ரன்களும் எடுத்து பெவிலியன் திரும்பினர். 112 ரன்களுக்கு 5 விக்கெட் இழந்து நியூசிலாந்து தடுமாற, கிளன் பிலிப்ஸ் 47 ரன்களும், ஜேம்ஸ் நிஷம் 36 ரன்களும், சாண்டர் 30 ரன்களும் சேர்க்க, நியூசிலாந்து அணி வெற்றி அருகே வர, முக்கிய கட்டத்தில் கொத்தாக அந்த அணி விக்கெட்டை இழக்க, நியூசிலாந்து அணி 242 ரன்களுக்கு சுருண்டது. இதன் மூலம், கடந்த 11 ஆண்டுகளாக நியூசிலாந்து அணி, ஆஸ்திரேலியாவை அதன் சொந்த மண்ணில் வீழ்த்தவில்லை.