ஜஸ்ட் 22 வயசு.. ஆனா அடி, இடி மாதிரி இறங்குது.. 24 பந்தில் வெலவெலக்க வைத்த "பட்டாஸ்"

223 ரன்கள்

இங்கிலாந்தில் இப்போது T20 Blast 2021 எனும் கிரிக்கெட் சீரிஸ் நடந்து கொண்டிருக்கிறது. இதில், நேற்று இரவு நடைபெற்ற ஆட்டத்தில் Middlesex, Surrey அணிகள் மோதின. சர்ரே அணியில் ஜேசன் ராய், சாம் கர்ரன், டாம் கர்ரன் ஆகிய இந்திய ரசிகர்களுக்கு முகம் தெரிந்த வீரர்கள் விளையாடினர். முதலில் பேட்டிங் செய்த சர்ரே அணி, 20 ஓவர்களில் 7 விக்கெட் இழப்பிற்கு 223 ரன்கள் குவித்தது.

7 பவுலர்கள்

இதில், நம் செய்தியின் நாயகன், அந்த 22 வயது இளைஞன் வில் ஜேக்ஸ், ஓப்பனராக களமிறங்கி 24 பந்துகளில் 70 ரன்களை பறக்கவிட்டார். இதில் 9 பவுண்டரிகளும், 5 பிரம்மாண்ட சிக்ஸர்களும் அடங்கும். இவரது பேட்டிங்கை கட்டுப்படுத்த மிடில்செக்ஸ் அணி கேப்டன் 7 பவுலர்களை பயன்படுத்தியிருக்கிறார். அவரது அடிக்கும், அவரது வயசுக்கும் துளியும் சம்பந்தம் இல்லை. ஆனால், பேட்டில் பந்து பட்டால், ஆடியன்ஸ் ஃபீல்டர்களாகின்றனர். பீல்டர்கள் ஆடியன்ஸ் ஆகிவிடுகின்றனர்.

தில் ஆல்ரவுண்டர்

வில் ஜேக்ஸ் ஒரு பவுலிங் ஆல் ரவுண்டர். பொதுவாக ஸ்பின் பவுலிங் ஆல்- ரவுண்டர்களை சில அதிமேதாவிகள் bits-and-pieces cricketers என்று அழைப்பார்கள். ஜேக்ஸையும் அப்படித்தான் நினைத்தார்கள், அழைத்தார்கள். ஆனால், இவரோ தனது ஆக்ரோஷ பேட்டிங்கால், அனைவரையும் வாயடைத்து விக்கித்து நிற்க வைத்துவிடுகிறார். இங்கிலாந்தின் அண்டர்-9 தொடங்கி அண்டர்-19 வரை அனைத்து வகை கிரிக்கெட்டிலும், தனது சக வீரர்களின் எபிலிட்டியை விட 10 மடங்கும் அதிகம் வெளிக்காட்டியதில் தேர்வார்களை வாயடைக்க வைத்தவர் வில் ஜேக்ஸ்.

விரைவில் இடம்

இவரது அபாரமான ஆல் ரவுண்டர் பெர்ஃபாமன்ஸ் பார்த்து, நியூசிலாந்தில் 2018ல் நடைபெற்ற அண்டர்-19 உலகக் கோப்பை கிரிக்கெட் தொடரில் இவரை துணை கேப்டனாக இங்கிலாந்து கிரிக்கெட் வாரியம் நியமித்தது என்றால் பார்த்துக்கொள்ளுங்க. விரைவில், இங்கிலாந்து டி20 அணிக்கு ஒரு மெகா அதிரடி ப்ளஸ் ரிஸ்ட் ஸ்பின்னர் இடம் பிடிக்கப் போகிறார் என்பதில் சந்தேகமில்லை.