சீனியர்களுக்கு ஆப்பு வைக்கும் இளம் வீரர்கள்- தெ.ஆப்பிரிக்க “ஏ” தொடரில் அசத்தல்

விஹாரி

தென்னாப்பிரிக்காவிற்கு சுற்றுப்பயணம் மேற்கொண்டுள்ள இந்திய ஏ அணி அங்கு 3 டெஸ்ட் போட்டிகள் கொண்ட தொடரில் விளையாடி வருகிறது. இதில் இடம்பெற்றுள்ள இளம் வீரர்கள் அற்புதமான ஆட்டத்தை வெளிப்படுத்தி வருகின்றனர். குறிப்பாக நடுவரிசை வீரரான விஹாரி 3 போட்டிகளில் விளையாடி 3 அரைசதம் அடித்துள்ளார். தற்போது வரை 214 ரன்கள் அடித்துள்ள விஹாரி, 72 ரன்களுடன் களத்தில் உள்ளார்.

ஈஸ்வரன்

இதே போன்று அபிமன்யூ ஈஸ்வரன் 3 டெஸ்ட்களில் விளையாடி 1 சதம், 1 அரைசதம் அடித்துள்ளார். இதுவரை அவர் இந்த தொடரில் 186 ரன்கள் அடித்துள்ளார். 27 வயதான அபிமன்பூ தொடக்க வீரர் அல்லது மூன்றாவது வீரராக களமிறங்க கூடியவர்.ஏற்கனவே இங்கிலாந்து தொடருக்கான இந்திய அணியிலும் இடம்பெற்று இருந்தார்.

இஷான் கிஷன்

விக்கெட் கீப்பர் பேட்ஸ்மேனான இஷான் கிஷன் நடப்பு தொடரில் 2 டெஸ்ட்களில் விளையாடி 135 ரன்கள் எடுத்துள்ளார். தற்போது 86 ரன்கள் விளாசி, சதத்தை நெருங்குகிறார். இதன் மூலம் டெஸ்ட் போட்டியிலும் தம்மால் கலக்க முடியும் என்று நிரூபித்துள்ளார் இஷான் கிஷன். இதே போன்று தொடக்க வீரரான பிரியாங் பாஞ்சலும் 2 டெஸ்ட்களில் விளையாடி 120 ரன்கள் எடுத்தார். இதில் 96 ரன்கள் அவர் அடித்த அதிகபட்ச ஸ்கோராகும்

பந்துவீச்சாளர்கள்

இதே போன்று இந்திய பந்துவீச்சாளர்களும் அசத்தி வருகின்றனர். 3 டெஸ்ட் போட்டிகளில் விளையாடி நவதீப் சைனி 10 விக்கெட்டுகளை வீழ்த்தினார். இஷான் போரேல் 2 டெஸ்ட்களில் விளையாடி 6 விக்கெட்டுகளையும், தீபக் சாஹர் தாம் வீசிய முதல் இன்னிங்சிலே 4 விக்கெட்டுகளை வீழ்த்தியும் கலக்கி வருகிறார். இளம் வீரர்களின் ஆதிக்கத்தால் தற்போது அறிவிக்கப்பட உள்ள தென்னாப்பிரிக்க தொடருக்கான இந்திய அணியில் பல சீனியர்களுக்கு ஆபத்து ஏற்படும் என்று எதிர்பார்க்கப்படுகிறது.