யூரோ கால்பந்து: ஸ்வீடனின் சாகச ஆட்டம் பலனில்லாமல் போனது! இங்கிலாந்துக்கு த்ரில் வெற்றி!

14-வது யூரோ கோப்பை போட்டியின் டி பிரிவு லீக் ஆட்டத்தில் ஏற்கெனவே தோற்றிருந்த ஸ்வீடன் அணி இங்கிலாந்து அணியுடன் மோதியது.

இங்கிலாந்து அணியின் கோரல் ஆட்டத்தின் 23-வது நிமிடத்தில் ஒரு கோல் அடித்தார். ஆனால் அதன் பின்னர் ஸ்வீடனும் இங்கிலாந்து அணியும் முதல் பாதியில் எந்த கோலும் அடிக்கவில்லை.

2-வது பாதியில் இங்கிலாந்து வீரர்களை அதிர்ச்சியின் உச்சத்துக்கு கொண்டு சென்றார் ஸ்வீடனின் மெல்பெர்க். 2-வது பாதியின் 49-வது நிமிடத்தில் தடாலடியாக ஸ்வீடனின் மெல்பெர்க் ஒரு கோலையும் 59-வது நிமிடத்தில் மற்றொரு கோலையும் போட ஸ்வீடன் சட்டென முன்னிலைக்குப் போனது. அதுவும் மெல்பெர்க் அந்தரத்தில் பறந்து தலையால் முட்டி கோலடித்த சாகசம் எல்லோரையும் வியப்பில் ஆழ்த்தியிருந்தது.

வேறுவழியே இல்லாமல் உஷாராக ஆட வேண்டிய நிலையில் அதிரடியாக ஆடிய இங்கிலாந்து அடுத்த 5-வது நிமிடத்தில் ஒரு கோல் அடித்தது. இந்த கோலை இங்கிலாந்தின் வால்கோட் அடித்தார். இதனால் இரு அணிகளும் சமனில் இருந்தன. ஆட்டத்தின் 78-வது நிமிடத்தில் பரபரப்பான திருப்பமாக இங்கிலாந்தின் வெல்பெக் ஒரு கோலடிக்க இங்கிலாந்துக்கு முன்னணி கிடைத்தது.

ஆட்டத்தின் முடிவில் இங்கிலாந்து அணி 3-2 என்ற கோல் கணக்கில் ஸ்வீடனை வீழ்த்தியது. டி பிரிவில் தொடர் தோல்விகளைச் சந்தித்திருக்கிற ஸ்வீடன் அணி இந்தப் பிரிவில் முதல் அணியாக தொடரில் இருந்து வெளியேறுகிறது.