'சாம்பியன்ஸ் லீக் 20-20' போட்டிக்கு கேளிக்கை வரி: தமிழக அரசு அறிவிப்பு

சென்னை: ஐ.பி.எல். போட்டிக்கு கேளிக்கை வரி விதிக்கப்படுவது போல 'சாம்பியன்ஸ் லீக் 20-20' கிரிக்கெட் போட்டிக்கும் கேளிக்கை வரி விதிக்கப்படும் என்று தமிழக அரசு அறிவித்துள்ளது.

சட்டசபையில் இன்று வணிகவரி, பதிவு துறை அமைச்சர் பி.வி.ரமணா தமிழ்நாடு கேளிக்கைகள் வரி திருத்த சட்ட முன்வடிவை தாக்கல் செய்தார். அதில் கூறியிருப்பதாவது:

இந்திய கிரிக்கெட் வாரியம் சார்பில் நடத்தப்படும் கிரிக்கெட் போட்டிகள் கேளிக்கை வரி வரையரைக்குள் வருகிறது. கிரிக்கெட் போட்டியில் பெருவாரியாக பங்குபெறும் நாடுகளில் இருந்து மிகச் சிறந்த உள்நாட்டு அணிகள் இடையே சாம்பியன்ஸ் லீக் 20-20 கிரிக்கெட் போட்டி விளையாடப்படுகிறது.

இந்தப் போட்டி இந்திய கிரிக்கெட் வாரியம் சார்பில் நடத்தப்படுகிறது. தற்போது அரசு, சாம்பியன்ஸ் லீக் 20-20 கிரிக்கெட் போட்டிக்கு கேளிக்கை வரி விதிக்க உள்ளது. இதற்கு ஏற்ப சட்டத்தை திருத்த முடிவு செய்துள்ளது கூறப்பட்டுள்ளது.

ஏற்கனவே ஐ.பி.எல். போட்டிக்கு கேளிக்கை வரி விதிக்கப்படுவது போல தற்போது சாம்பியன்ஸ் லீக் போட்டிக்கும் கேளிக்கை வரி விதிக்கப்படுகிறது என்பது குறிப்பிடத்தக்கது.