ரோஜர் ஃபெடரர்
ஜெர்மனியில் Halle ஓபன் டென்னிஸ் தொடர் நடைபெற்று வருகிறது. இதில், நேற்று (ஜூன்.16) நடந்த காலிறுதிப் போட்டியில் உலகின் முன்னாள் நம்பர்.1 வீரரான ஸ்விட்சர்லாந்தின் ரோஜர் ஃபெடரரும், 20 வயதான கனடாவின் பெலிக்ஸ் ஆகர் அலியஸ்சிம் (Felix Auger-Aliassime) எனும் வீரரும் மோதினர்.
ஒன்னேமுக்கால் மணி நேரம்
அனுபவம் இல்லாத 20 வயதான இளம் வீரர் என்பதால், பெடரர் சிறிது நேரத்தில் ஆட்டத்தை முடிப்பார் என்றே எதிர்பார்க்கப்பட்டது. ஆனால், நடந்தது என்னவோ அப்படியே ரிவர்ஸாக. ஹாலேவில் 10 முறை சாம்பியன் கோப்பை வென்றிருக்கும் பெடரர், தன்னை விட 19 வயது இளமையான பெலிக்ஸிடம் வெறும் 1 மணி நேரம் 45 நிமிடங்களில் சரண்டரானார்.
பெரும் பின்னடைவு
பெடரரை 4-6, 6-3, 6-2 என்ற செட் கணக்கில் பெலிக்ஸ் தோற்கடித்தார். வருகிற 28ம் தேதி தொடங்கும் விம்பிள்டன் போட்டிக்கு தயாராகி வரும் பெடரருக்கு இந்த தோல்வி பெரும் பின்னடைவாக அமைந்துள்ளது. பெலிக்ஸ் செர்வ்கள் அனைத்தும் நம்பமுடியாத வகையில் இருந்தது. அவற்றை சமாளிக்க பெடரர் மிகவும் சிரமப்பட்டார்.
ரசிகர்கள் வேதனை
பெடரரின் இந்த தோல்வி அவரது ரசிகர்களுக்கு பெரும் ஏமாற்றம் அளித்துள்ளது. அவரால், முன்பு போல் விளையாட முடியவில்லையோ என்ற சந்தேகம், இந்த தோல்விக்கு பிறகு கடுமையாக எழுந்துள்ளது. இதில் ஆச்சர்யம் என்னவெனில் பெடரருக்கும், பெலிக்ஸுக்கும் ஒரே தேதியில் தான் பிறந்தநாள். ஆகஸ்ட் 8. தோனி இப்போது சிக்ஸர்கள் அடிக்க முடியாமல் திணறுவதைப் போன்று, பெடரர் தன்னுடைய பழைய ஆட்டத்தை வெளிப்படுத்த முடியாமல் திணறுவதை பார்க்கும் போது வேதனையாக இருப்பதாக ரசிகர்கள் சமூக தளங்களில் பதிவிட்டு வருகின்றனர்.