டெல்லி அதிரடி காட்டியது... நிறுத்தி நிதானமாக வென்றது ஹைதராபாத்... பிளே ஆப் சுற்றுக்கு முன்னேறியது!

அசத்தும் பவுலிங்

இந்த சீசனில் ஹைதராபாத் மிகவும் வலிமையான அணியாக உள்ளது. பேட்டிங்கில் ஹைதராபாத் அணி கில்லியாக உள்ளது. அதே நேரத்தில் குறைந்த ஸ்கோரை அடித்தாலும், அதை சமாளிக்கக் கூடியதாக அதன் பவுலிங் உள்ளது.

வெற்றி நம்பிக்கை

டெல்லி, ஹைதராபாத் அணிகள் இம்மாதம் 5ம் தேதி மோதின. அதில் ஹைதராபாத் 7 விக்கெட் வித்தியாசத்தில் வென்றது. பிருத்வி ஷா, ஸ்ரேயாஸ் ஐயர் ஆகியோர் அபாரமாக ஆடியபோதும், ஹைதராபாத் அணியின் ஒட்டுமொத்த ஆட்டத்துக்கு ஈடு கொடுக்க முடியவில்லை. இன்றைய ஆட்டத்தில் வெல்வோம் என்று டெல்லி நம்பிக்கையுடன் இருந்தது.

ரிஷப் பந்த் அதிரடி

டெல்லியில் நடந்த ஆட்டத்தில் டாஸ் வென்ற டெல்லி பேட்டிங் தேர்வு செய்தது. ஒரு பக்கம் விக்கெட்டுகள் சரிந்து கொண்டிருந்தது. ஆனால் மறு பக்கம் விக்கெட் கீப்பர் ரிஷப் பந்த் அதிரடியாக விளையாடி சதமடித்தார். அவர் 63 பந்துகளில் 15 பவுண்டரிகள், 7 சிக்சர்களுடன், 128 ரன்கள் எடுத்தார். டெல்லி அணி 20 ஓவர்களில் 5 விக்கெட் இழப்புக்கு 187 ரன்கள் சேர்த்தது.

பிளே ஆப் சுற்றில் ஹைதராபாத்

188 ரன்கள் வெற்றி இலக்குடன் விளையாடிய ஹைதராபாத், 9 விக்கெட் வித்தியாசத்தில் வென்றது. 18.5 ஓவர்களில் ஒரு விக்கெட் இழப்புக்கு 191 ரன்கள் எடுத்து வென்றது. அலெக்ஸ் ஹேல்ஸ் 14 ரன்களுக்கு அவுட்டானார். அதன்பிறகு, ஷிகார் தவான் 50 பந்துகளில் 9 பவுண்டரிகள், 4 சிக்சர்களுடன் 92 ரன்களும், கேப்டன் கேன் வில்லியம்சன் 53 பந்துகளில் 8 பவுண்டரிகள், 2 சிக்சர்களுடன் 83 ரன்களும் எடுத்து ஆட்டமிழக்காமல் அணியின் வெற்றியை உறுதி செய்தனர். இருவரும் நிதானமாக விளையாடி, இரண்டாவது விக்கெட்டுக்கு 176 ரன்கள் சேர்த்தனர். இந்த வெற்றியை அடுத்து, 18 புள்ளிகளுடன், பிளே ஆப் சுற்றுக்கு முன்னேறியது. இந்த சீசனில் பிளே ஆப் சுற்றுக்கு முன்னேறிய முதல் அணியானது ஹைதராபாத்.