இங்கிலாந்துக்கு எதிரான 3 டெஸ்ட்கள்.... இந்திய அணியில் ரிஷப் பந்த் மற்றும் தினேஷ் கார்த்திக்!

பந்த்துக்கு வாய்ப்பு

மூன்று டெஸ்ட் போட்டிகளுக்கான இந்திய அணியில், இளம் விக்கெட் கீப்பர் மற்றும் அதிரடி பேட்ஸ்மேனான ரிஷப் பந்த் சேர்க்கப்பட்டுள்ளார். சமீபத்தில் நடந்த ஐபிஎல் போட்டியில் டெல்லியைச் சேர்ந்த பந்த், டெல்லி டேர்டெவில்ஸ் அணிக்காக அதிரடியாக விளையாடினார். மேலும் இங்கிலாந்தில் விளையாடி வரும் இந்திய ஏ அணிக்காகவும் சிறப்பாக விளையாடி வருகிறார்.

ஷமிக்கு மீண்டும் வாய்ப்பு

மனைவி அளித்த பாலியல் புகார்களில் சிக்கிய முகமது ஷமியும் அணியில் சேர்க்கப்பட்டுள்ளார். கடைசியாக ஏப்ரல் மாதம் விளையாடிய அவர் யோ-யோ தேர்வில் உடல் தகுதியை நிரூபித்ததால் மீண்டும் அணியில் இடம்பெற்றுள்ளார்.

புவிக்கு காயம்

காயம் காரணமாக வேகப்பந்து வீச்சாளர்கள் புவனேஸ்வர் குமார் முதல் மூன்று போட்டிகளுக்கு தேர்வு செய்யப்படவில்லை. அதே நேரத்தில் ஜஸ்பிரித் பும்ரா சேர்க்கப்பட்டுள்ளார். உடல்நிலை தேறினால், 2வது போட்டியில் அவர் பங்கேற்பார். காயம் காரணமாக விக்கெட் கீப்பர் சாகா விலகியதால், தமிழகத்தைச் சேர்ந்த தினேஷ் கார்த்திக் அணியில் இடம்பெற்றுள்ளார். ஒருதினப் போட்டியில் சிறப்பாக பந்து வீசிய குல்தீப் யாதவும் அணியில் உள்ளார். யுஸ்வேந்திர சாஹல் பரிசீலிக்கப்படவில்லை.

இந்திய அணி விவரம்

இந்திய அணியின் விவரம்: விராட் கோஹ்லி (கேப்டன்), ஷிகார் தவான், கேஎல் ராகுல், முரளி விஜய், சத்தேஸ்வர் புஜாரா, அஜங்யா ரஹானே (துணை கேப்டன்), கருண் நாயர், தினேஷ் கார்த்திக், ரிஷப் பந்த், அஸ்வின், ரவீந்திர ஜடேஜா, குல்தீப் யாதவ், ஹார்திக் பாண்டயா, இஷாந்த் சர்மா, முகமது ஷமி, உமேஷ் யாதவ், ஜஸ்பிரித் பும்ரா, ஷர்துல் தாகுர்.