கருப்பினத்தவருக்கு ஆதரவாக லோகோ... மேற்கிந்திய தீவுகள் அணி தீவிரம்

இங்கிலாந்தில் சுற்றுப்பயணம்

இங்கிலாந்தில் சுற்றுப்பயணம் மேற்கொண்டுள்ள மேற்கிந்திய தீவுகள் அணி வரும் 8ம் தேதி முதல் 3 போட்டிகள் கொண்ட டெஸ்ட் தொடரில் விளையாடவுள்ளனர். முதல் போட்டி சௌதாம்ப்டனின் ஏஜியஸ் பௌல் மைதானத்தில் நடைபெறவுள்ள நிலையில், இதற்கென மேற்கிந்திய தீவுகள் அணி தற்போது தனிமைப்படுத்தப்பட்டு, பயிற்சிகளில் ஈடுபட்டுள்ளனர். தொடர்ந்து போட்டிகளிலும் விளையாடவுள்ளனர்.

'ப்ளாக் லைவ்ஸ் மேட்டர்' லோகோ

இந்நிலையில், இந்த தொடரில் விளையாடவுள்ள மேற்கிந்திய தீவுகள் அணி வீரர்கள், கருப்பினத்தவர்களின் பாதுகாப்பு மற்றும் சமநிலையை பாதுகாக்கும்வகையில் 'ப்ளாக் லைவ்ஸ் மேட்டர்' என்ற லோகோவை தங்களது டி-சர்ட்டில் அணிந்து விளையாடவுள்ளதாக மேற்கிந்திய தீவுகள் அணியின் கேப்டன் ஜேசன் ஹோல்டர் தெரிவித்துள்ளார்.

அலிசா ஹோசன்னா வடிவமைப்பு

இந்த லோகோவை வீரர்கள் தங்களது டி-சர்ட்டில் அணிய ஐசிசியும் தனது அனுமதியை அளித்துள்ளது. அலிசா ஹோசன்னா என்பவர் இந்த லோகோவை வடிவமைத்துள்ளார். முன்னதாக இந்த மாத துவக்கத்தில் துவங்கிய 20 பிரீமியர் லீக் கால்பந்தாட்ட கிளப்களின் போட்டிகளில் இந்த லோகோ அணியப்பட்டுள்ளது.

ஊழலுக்கு இணையான விவகாரம்

இந்நிலையில், இந்த விவகாரத்தில் விழிப்புணர்வை ஏற்படுத்தும் கடமை தங்களுக்கு உள்ளதாக தெரிவித்துள்ள ஹோல்டர், ஊக்கமருந்து மற்றும் ஊழலுக்கு இணையாக இந்த விவகாரம் கவனத்தில் கொள்ளப்பட வேண்டும் என்றும் தெரிவித்துள்ளார். மேலும் எந்த ஒரு மனிதனும் தன்னுடைய நிறத்தை கொண்டு மதிக்கப்படக்கூடாது என்றும் உறுதியாக தெரிவித்துள்ளார்.