'கே'ப்பே விடாமல் 'கிடா' வெட்டியவர்கள் வரிசையில் கோஹ்லி....!

பாதுல்லா: இடைவெளி இல்லாமல் தொடர்ந்து 100 ஒரு நாள் போட்டிகளில் ஆடி புதிய சாதனை படைத்துள்ளார் வங்கதேசத்தில் நடைபெறும் ஆசியக் கோப்பை போட்டியில் இந்திய கேப்டனாக செயல்பட்டு வரும் விராத் கோஹ்லி.

இந்த வகையில் அவர் ஏற்கனவே இப்படிப்பட்ட சாதனையை நிகழ்த்திய அஸாருதீன் மற்றும் சச்சின் டெண்டுல்கர் வரிசையில் இணைந்துள்ளார்.

இந்திய வீரர்களில் இந்த மூன்று பேர் மட்டுமே தொடர்ந்து எந்த விதமான இடைவெளியும் இல்லாமல் 100 அல்லது அதற்கு மேலான ஒரு நாள் போட்டிகளில் விளையாடியவர்கள் ஆவர்.

அடுத்தடுத்து செஞ்சுரி போட்ட கோஹ்லி

ஆசியக் கோப்பை முதல் போட்டியில் வங்கதேசத்துக்கு எதிராக கோஹ்லி அபாரமாக ஆடி சதம் போட்டார். இன்று அவர் இலங்கையுடன் நடந்த போட்டியில் கலந்து கொண்டபோது இடைவெளி இல்லாமல் தொடர்ந்து 100வது போட்டியில் ஆடிய பெருமையைப் படைத்தார்.

சச்சின் இடைவெளியே இல்லாமல் 185

சச்சின் டெண்டுல்கர் இடைவெளியே இல்லாமல் தொடர்ந்து 185 ஒரு நாள் போட்டிகளில் ஆடியவர் ஆவார். இவர்தான் இந்திய வீரர்களில் அதிக அளவில் இடைவெளி இல்லாமல் ஒரு நாள் போட்டிகளில் ஆடியவர்.

அஸாருதீன் 126

முன்னாள் கேப்டன் அஸாருதீன் இடைவெளி இல்லாமல் தொடர்ந்து 126 போட்டிகளில் ஆடியவர் ஆவார்.

குறுகிய காலத்தில் 100 போட்ட கோஹ்லி

ஆனால் மிகக் குறுகிய காலத்தில் 100 போட்டிகளைக் கொண்டது கோஹ்லிதான்.

2010 முதல்

2010ம் ஆண்டு ஆகஸ்ட் 25ம் தேதி முதல் இன்று வரை தொடர்ந்து 100 போட்டிகளில் ஆடியுள்ளார் கோஹ்லி. இடையில் எந்த ஒரு நாள் தொடரிலும் அவர் பங்கேற்காமல் இருந்ததில்லை.